Тошкент вилоятининг Қуйи Чирчиқ туманида кўп қаватли уй қурилиши тўхтатилди. Бу ҳақда Қурилиш ва уй-жой коммунал хўжалиги вазирлиги хабар берди.
Маълум қилинишича, “Сурум” маҳалласида қурилаётган мазкур кўп қаватли турар жой биносининг ҳолати ҳамда лойиҳалари инспекция ходимлари томонидан ўрганилганда, ушбу турар жой комплексларининг айрим блоклари давлат рўйхатидан ўтмасдан, яъни белгиланган тартибдаги ҳужжатларсиз, давлат назоратисиз қурилаётгани аниқланган.
У ерда А8-блоккача рўйхатдан ўтган бўлиб, А9, А10, А11-блоклар рўйхатдан ўтмаган, ноқонуний ҳолатда қурилиш-монтаж ишлари бошлаб юборилган. Д1, Д2 блокларида ҳам худди шундай ҳолат аниқланган.
Мониторинг жараёнида бошқа блоклардаги қурилиш ишлари кўздан кечирилганда, ишчилар хавфсизлиги таъминланмагани, айрим юк кўтарувчи бетон конструкцияларининг юза қисмида ғоваклар борлиги аниқланган. Шу билан бирга, объектнинг остки қисмида сув тўпланиш ҳолатлари кузатилган.
“Бино фундамент қисмига дренаж, сув қочириш тизимлари кўзда тутилган, амалда сув қочириш тизимлари ўрнатилмаган. Шу сабабли, бино фундамент қисми сув остида қолмоқда. Ваҳоланки, бу бино фундаментига зарар етказишига олиб келади”, дейди мониторингда қатнашган инспекция ходими.
Хабарда айтилишича, мазкур ҳолатлар юзасидан ўзбошимчалик билан, давлат рўйхатидан ўтмасдан қурилаётган блоклардаги барча қурилиш ишлари давлат рўйхатидан ўтказилгунига қадар тўхтатилди. Шу билан бирга, сифатсиз бажарилган қисмларнинг бузилиши, ишчиларнинг хавфсизлигини тўлиқ таъминлаш ҳамда ҳудудда дренаж тизимларини ўрнатиш бўйича инспекция ходимлари томонидан белгиланган муддатда бажарилиши шарт бўлган ёзма кўрсатмалар берилди.
Президент топшириғига асосан қурилиш соҳасидаги жараёнларни самарали ва шаффоф бошқариш мақсадида янги қурилишларда давлат назорати тизими жорий этилган. Ҳар бир объект учун QR кодли паспорт жорий этилган бўлиб, ушбу код орқали объект ҳақидаги барча маълумотларни реал вақт режимида олиш мумкин. Бу республикадаги барча фуқаролар ва жамоат назорати вакилларига қурилиш объектлар ҳолатини қулай тарзда кузатиш имконини беради.
Ўзбекистонда 2025 йил 1 июлдан эскроу тизими ҳам ишга туширилди. Эндиликда ҳали битмаган уйдан хонадон сотиб олмоқчи бўлган фуқаро, ўша уйга ўз маблағларини тикиш орқали улушдорга айланади. Бунинг учун қурувчига эмас, банкка тўлов қилади. Улушдорнинг тўлаган пуллари алоҳида эскроу ҳисобварағида йиғиб борилади. Уй битмагунча қурувчи компания бу пуллардан фойдалана олмайди. Турар жойни эса ўз маблағлари ёки банк кредити асосида қуриб битказади.
Изоҳ (0)