Ижтимоий тармоқларда Тошкент шаҳридаги кўп қаватли уйларни қуриш учун сифатсиз ғишт маҳсулоти олиб келингани ҳақида видеолавҳа тарқалди. Видеода пишган ғишт маҳсулоти яроқсизлиги айтилган.
«Лойдек майдаланиб кетяпти. Исталганини олиб кўринг, иккига эмас, титилиб, майда бўлиб кетяпти. Қўл билан ушлаб силкитилса, титилиб кетяпти», — дейди видео муаллифи.
Ҳолат юзасидан Қурилиш вазирлиги матбуот хизмати изоҳ берди.
«Тошкент шаҳар Яшнобод тумани Ўш кўчасида жойлашган кўп қаватли турар жой биноларининг қурилиши Вазирлар Маҳкамасининг ‘Қурилиш соҳасига оид ягона маъмурий қурилиш регламентларини тасдиқлаш тўғрисида’ги қарори бандларига зид равишда Тошкент шаҳар Қурилиш соҳасида ҳудудий назорат инспекцияни хабардор қилмаган ҳолда амалга оширилган», – дейилади вазирлик ахборотида. Лекин масъул идора қурилиш ишлари регламентнинг айнан қайси бандларига зид олиб борилганига аниқлик киритмаган.
Таъкидланишича, қурилиш фирмасига инспекция томонидан Маъмурий Жавобгарлик тўғрисидаги Кодексининг 99-моддаси 7-қисми (Шаҳарсозлик тўғрисидаги қонунчиликка мувофиқ биноларни, иншоотларни ёки бошқа объектларни қуришга, реконструкция қилишга ва капитал таъмирлашга тақиқлар (чекловлар) белгиланган зоналарда шундай ишларни амалга ошириш — фуқароларга базавий ҳисоблаш миқдорининг эллик бараваридан етмиш бараваригача, мансабдор шахсларга эса — етмиш бараваридан юз бараваригача миқдорда жарима солишга сабаб бўлади) билан чора кўрилган.
Мазкур қурилиш объектида 2022 йилнинг август ойи охирларида «Оҳангарон соф ғиштлари» МЧЖ томонидан олиб келинган ғишт маҳсулоти сифатсиз эканлиги аниқланган. Қурилиш ишларига яроқсиз бўлганлиги учун ғиштдан фойдаланилмаган.
Вазирликнинг қўшимча қилишича, ҳозирги кунда Тошкент шаҳар Қурилиш соҳасида ҳудудий назорат инспекцияси томонидан «Оҳангарон соф ғиштлари» МЧЖ корхонасига нисбатан чора кўрилмоқда.
Изоҳ (0)