Олмалиқда қурилиши тўхтатилган уй ҳақида қўшимча тафсилотлар очиқланди: 9 қаватли уйнинг 3 қавати бузилиши мумкин

Тошкент вилоятининг Олмалиқ шаҳрида қурилаётган кўп қаватли уйлардан бирининг қурилиш талабларига риоя этилмасдан барпо этилаётгани, келажакда бу уйда яшаш инсон ҳаёти учун хавфли экани айтилган видео тарқалди. Мазкур ҳолатга муносабат билдирган Қурилиш вазирлиги ушбу турар жой биносини қуришда “Зилзилавий ҳудудларда қурилиш” меъёр талаблари бузилгани-ю, геолог далолатномаси ва замин тупроқ қатлами зичлиги бўйича лаборатория хулосалари тўлиқ расмийлаштирилмаган ҳолда қурилаётганини билдирди.

“Дарё” жамоатчиликнинг ушбу кўп қаватли уйнинг келажакдаги тақдири нима бўлади, уй ими-жимида фойдаланишга топшириб юборилмайдими деган қатор саволларига жавоб олиш мақсадида ушбу қурилиш объектига бориб, қурувчи ва қурилишга масъул ходимлар билан суҳбатлашди.

“Видео муаллифининг арматуралар ингичкалигига эътирозига жавобан шуни айтаманки, лойиҳада ўнлик арматура қўйилиши белгиланган бўлиб, стандарт талаб ҳам шу бўлган. Қолаверса қурилиш ишлари тугатилмаган ва видеода чала ишлар кўрсатилган. Шунингдек, видео муаллифи бетон жудаям сифатсиз эканини айтиб, қўлда эланиб кетаётганини айтган. Аслида у ушлаб кўрсатган бетон қолдиқлари қурилиш ишлари пайтида юзага келган бетон қолдиқлари ҳисобланади. Айнан бетон эмас. Бетон жуда мустаҳкам қуйилган”, — дейди шу кўп қаватли уй қурувчиси бўлган “Orient avto universal“ қурилиш ташкилоти раҳбари Умид Севинчов.

Қурувчининг “Дарё”га билдиришича, у қураётган уйнинг камчиликлари кўринган видеони унга таниш ва у билан ҳамкорликда ишлаган фуқаро тавсирга олган.

“Бу видеони менга таниш фуқаро анча аввал тасвирга олган. Ва шу кунларда тарқатди. У уй харидори эмасди. Мен ундан қурилишда керак бўладиган қурилиш асбобларини олиб тургандим. У бериб турган қурилиш асбобининг ижара нархини 80 миллион сўм дегач, бу қиммат арзонлаштиринг дегандим. Кейин нақд бўлса 60 миллион беринг деганди. Пулини бергандим”, — дейди видеотасвирлар қандай тарқалганини айтган қурувчи.

Қурилиш ишларида техник назоратчи сифатида ишлаган Азиз Оловхоновнинг айтишича, тўққиз қават бўлиб қад ростлаган уйнинг 8- ва 9-қаватлари талабга жавоб бермайди.

“Мазкур ‘дом’нинг 1–6-қаватлари талабга жавоб берадиган даражада қурилган. Кейинги қаватларда назорат йўқолиб, ишлар сифати бузилган. Бу бўйича биз қурувчини қайта-қайта огоҳлантирганмиз. Аввалига оғзаки огоҳлантириш бердик, кейин ёзма тарзда огоҳлантириб, камчиликларни бартараф этиш бўйича қилиниши керак бўлган ишларни айтдик. Аммо амал қилинмагани сабаб, бугунги кунда шундай вазият юзага келган”, — дейди Азиз Оловхонов.

Қурувчи Умид Севинчов қурилишдаги камчиликлар юзасидан унга огоҳлантириш берилганини, аммо камчиликларни бартараф этмаганини тан олди.

“Ўзим молия соҳаси мутахассисиман. Қурилиш ишлари билан икки йилдан бери шуғулланиб келяпман. Бундан аввал аҳоли учун турар жой биноларини қурмаганман. Агар қурилиш ишлари талабга жавоб берилмаслиги айтилиб, 7–8–9-қаватлар бузилиши кераклигини айтишса, бузамиз, бошқа имконимиз ҳам йўқ”, — дейди қурувчи.

Аниқланишича, мазкур уй қурилиши 2021 йил ноябрь ойидан бошланган бўлиб, лойиҳа қиймати 10,5 миллиард сўмни ташкил қилади. Турар жой биносининг кв/метри аҳолига субсидия асосида 5 миллион 187 минг сўмдан сотилади.

Тошкент вилояти қурилиш соҳаси ҳудудий инспекцияси инспектори Маъруф Мажидовнинг маълумот беришича, мазкур объектдаги қурилиш ишлари бошланган пайтда қурилиш ишларини бошлаш учун талаб этиладиган 11 турдаги ҳужжат масъуллар томонидан тасдиқланмагани боис, қурувчига қурилиш ишларини тўхтатиш бўйича ёзма кўрсатма берилган.

“Қурувчи белгиланган талабларни бажармагани сабаб 2023 йилнинг 14 март куни қурилишни тўхтатиб, ташкилот раҳбарини маъмурий жавобгарлик бўйича 4,5 миллион сўм миқдорида жаримга тортдик”, — дейди масъул.

Маъруф Мажидовнинг қўшимча қилишича, эндиликда мазкур кўп қаватли уйнинг аввалига зилзилага бардошлилиги ўрганилади. Бино зилзилага бардошли деб топилгач, 7–8–9-қаватларнинг камчиликлари бартараф этилиши лозим бўлади.

“Агар қўшимча таъмирлаш ишлари орқали камчиликларни бартараф этиш имкони бўлмаса, бинонинг талабга жавоб бермаган қаватлари бузилиб, қайта қурилади”, — дейди Маъруф Мажидов.

Тошкент вилояти қурилиш соҳасида ҳудудий назорат инспекцияси бошлиғи биринчи ўринбосари Отабек Тиллахўжаевнинг “Дарё”га билдиришича, мазкур кўп қаватли уйнинг қурилиши вазирлик назоратига олинган бўлиб, келажакда одамлар ҳаёти учун хавфсиз деб топилсагина қурилиш ишлари давом эттирилади. Масъулнинг айтишича, мутахассислар фикрига қараб, мазкур бино таг-туги билан бузиб ташланиши ҳам мумкин.

“Мутахассислар қандай фикр берса шунга амал қилинади. Балки бино таг-туги билан бузиб ташланиб, қайта қурилиши ҳам мумкин. Ёки пастки қаватлар талабга жавоб беради деган хулоса берилса, юқори қаватлари бузилиб, қайта қурилиши мумкин”, — дейди Отабек Тиллахўжаев.

Отабек Тиллахўжаевнинг маълумот беришича, Тошкент вилоятида қурилиш сифатини текширувчи ташкилот назоратида 3207 та объект мавжуд бўлиб, назоратчиларнинг ҳар бирига 140-150 тадан объект тўғри келади.

Таъкидланишича, Тошкент вилояти қурилиш соҳасида ҳудудий назорат инспекцияси томонидан 2022 йил давомида 19635 та мониторинг тадбирлари амалга оширилган бўлиб, 801 та объект эгасига маъмурий жавобгарлик белгиланган. 8207 та объект эгасига камчиликларни бартараф этиш юзасидан ёзма огоҳлантириш берилган.