“Иссиқликтаъминоти” АЖ раҳбарияти Ўзбекистонда иссиқлик таъминоти объектларини қуришга 500 млрд сўм ажратилганини маълум қилди.
Хабар қилинишича, 2025 йилда инвестиция дастури доирасида республика бюджети маблағлари ҳисобидан иссиқлик таъминоти объектларини қуриш, реконструкция ва модернизация қилиш учун 500 млрд сўм маблағ ажратилди.
Инвестиция дастури доирасида республика бюджети маблағлари ҳисобидан 2025—2029 йилларда иссиқлик тизимларидаги эскирган 103 та қозонхона ва 1,632 минг км иссиқлик тармоқларини, шу жумладан, 2025—2026 йилларда 18 та қозонхона ва 258 км иссиқлик тармоқлари янгиланади.
Ҳудудлардаги 8 та қозонхона ва 80 км иссиқлик тармоқларида қурилиш ва модернизация ишлари, 25 та “Янги Ўзбекистон” массивларида қозонхона ва иссиқлик тармоқлари қуриш ишлари амалга оширилмоқда.
Лойиҳаларни амалга ошириш натижасида ҳудудлардаги 35 мингдан ортиқ хонадондан иборат 1 084 та кўп қаватли уйлар ва 110 та ижтимоий соҳа объектларини иссиқлик энергияси билан таъминлаш кўзда тутилган. Шу билан бирга, иссиқлик таъминоти тизимини “ёпиқ” тизимга ўтказиш учун қўшимча 50 млрд сўм маблағлар ажратилади.
Давлат-хусусий шериклик асосида 9 та лойиҳа, жами қуввати 756 МВт бўлган 8 та қозонхона ва 403 км иссиқлик тармоқларини модернизация қилиш, 2 105 та индивидуал иссиқлик пунктларини ўрнатиш режалаштирилган.
Лойиҳаларни амалга ошириш натижасида ҳудудлардаги 83 мингдан ортиқ хонадондан иборат 1 850 та кўп қаватли уйлар ва 418 та ижтимоий соҳа объектларини иссиқлик энергияси таъминотини яхшилаш кўзда тутилган.
Жорий йилда давлат-хусусий шериклик асосида Нукус ва Бухоро шаҳарлари иссиқлик таъминоти тизимларида бир вақтнинг ўзида икки турдаги энергия ишлаб чиқаришни назарда тутувчи когенерация технологияларини жорий этиш бўйича лойиҳаларга старт берилади.
Лойиҳаларни амалга ошириш натижасида ҳудудлардаги 121 мингдан ортиқ хонадондан иборат 2 634 та кўп қаватли уйлар ва 480 та ижтимоий соҳа объектларини иссиқлик энергияси таъминотини яхшилаш кўзда тутилган.
“Иссиқликтаъминоти” АЖ президентнинг 2025 йил 11 мартдаги қарори билан Қурилиш ва уй-жой коммунал хўжалиги вазирлиги ҳузурида ташкил этилганди.
“Иссиқликтаъминоти” АЖга қуйидаги вазифалар юклатилган:
- таркибидаги ташкилотларнинг тариф сиёсатини юритиш;
- операсион самарадорликни ошириш, рақамлаштириш, кадрлар малакасини ошириш;
- давлат-хусусий шериклик лойиҳаларини мувофиқлаштириш ҳамда уларнинг бажарилишини назорат қилиш;
- лойиҳалар доирасида белгиланган самарадорликнинг энг муҳим кўрсаткичлари (KPI) ижросини мониторинг қилиш;
- “Иссиқликтаъминоти” АЖ ҳузурида масъулияти чекланган жамият шаклидаги буюртмачи хизматини ташкил этиш;
- инжиниринг компаниясининг низомини ишлаб чиқиш ҳамда тасдиқлаш.
Изоҳ (0)