Президентимиз раислигида қурилиш материаллари саноатини ривожлантириш ва аҳолини уй-жой билан таъминлаш масалалари бўйича ўтказилган видеоселектор йиғилишида берилган топшириқлар ижроси юзасидан ўтказилган матбуот анжумани.
Қурилиш вазирлигидан масъуллар иштирокида АОКАда жорий йилнинг 9 декабрида матбуот анжумани ўтказилди. Унда маълум қилинишича, ипотека дастури асосида, жорий йилда 207 та массивда 1 минг 75 та кўп қаватли уйлар қурилиши олиб борилмоқда. Жами хонадонлар сони — 45,5 мингта.
Жумладан:
- «Қишлоқ қурилиш инвест» компанияси иштирокида қишлоқ жойларда 11,3 мингта квартирали;
- «Шаҳар қурилиш инвест» компанияси иштирокида фуқароларнинг алоҳида тоифалари учун 3,5 мингта квартирали;
- янги тартиб доирасида тадбиркорлик субъектлари томонидан 30,6 мингта квартирали уйлар қурилмоқда.
- янги тартиб асосида 4 та ҳудудда — Андижон, Бухоро, Самарқанд, Сурхондарёда 2 минг квартирали 49 та уйлар;
- Осиё тараққиёт банки маблағлари ҳисобига «Қишлоқ қурилиш инвест» иштирокида 2 минг 900 квартирали 138 та уйлар ҳам қурилмоқда.
Уйларнинг қурилиш-монтаж ишлари сифати юзасидан қурилиш соҳасида назорат инспекциялари томонидан назорат ўрнатилган. Ҳудудий инспекциялар томонидан мазкур объектларда жами 4074 марта назорат ишлари амалга оширилган. Қурилишда аниқланган камчиликларни бартараф этиш бўйича жами 2 880 та ёзма кўрсатмалар берилди.
Шунингдек, 47 та мансабдор шахсга нисбатан чора кўриш учун ҳужжатлар тайёрланиб, судларга юборилди. Қурилиш-монтаж ишлари сифатсиз бажарилган 12 та объектда ишлар вақтинча тўхтатилди.
Объектларда сифатсиз материал ва буюмлардан фойдаланилганлик учун тегишли ташкилотларга 26 та тақдимнома киритилди.
Уйлар қурилишида рейтинги 3 та «S»дан юқори пудрат ташкилотлари иштирок этади. Бугунги кунда бу каби салоҳиятли пудрат ташкилотлари сони 4876 тадан ортиқни ташкил этмоқда.
Уйлар қурилишида маҳаллий қурилиш материалларидан фойдаланиш, иссиқлик тежовчи қопламалар ва замонавий технологияларни қўллаш таъминланади. Бунинг учун қурилиш материаллари ишлаб чиқарувчи маҳаллий корхоналар билан ҳам ишланмоқда. Келгусида ушбу ишларни индустрия даражасига кўтариб, уй-жой қурилиши кластерларини ташкил этиш бўйича ҳам ишланмоқда.
Дастлабки босқичда Тошкент шаҳри, Фарғона, Навоий, Самарқанд ва Тошкент вилоятларида кластерларни ташкил қилиш мақсадга мувофиқ. Чунки мазкур ҳудудларда етарлича миқдорда пудрат ташкилотлари, лойиҳа институтлари, ишлаб чиқариш корхоналари, хомашё базаси ва инфратузилма мавжуд.
Ҳозирги кунда 2022 йилда уй-жойлар қуриш дастури лойиҳаси ишлаб чиқилди. Бунда Фарғона вилояти, Боғдод туманида барпо этилган «Мурувват» массиви намунаси асосида барча ҳудудларда «Янги Ўзбекистон» массивларини қуриш кўзда тутилмоқда.
Ҳокимликлар билан биргаликда 30 га яқин массив танлаб олинди. Уларда кўп қаватли уйлар, ижтимоий соҳа, бозор инфратузилмаси ва муҳандислик объектларини жойлаштириш бўйича бош режа лойиҳалари ишлаб чиқилди.
Унга кўра, келгуси йилда 2191 та уйлар, 27 та мактаб, 40 та боғча, 25 та оилавий поликлиника ва 120 дан ортиқ савдо-маиший хизмат мажмуаси қуриш кўзда тутилмоқда.
Матбуот анжуманига ташриф буюрган ОАВ вакиллари ҳам ўзларини қизиқтирган барча саволларга тегишли жавоблар олишди.
Расмий саҳифаларимиз:
Реклама ҳуқуқи асосида.
Изоҳ (0)