Тошкент вилоятида 3 та кўп қаватли уй, савдо мажмуаси ва божхона терминали ноқонуний равишда қурилаётгани аниқланди

Қурилиш вазирлиги Тошкент вилоятидаги тасдиқланмаган ва экспертиза органларининг ижобий хулосаси олинмаган лойиҳа ҳужжатларисиз, қурилиш-монтаж ишларини бошлаш юзасидан ваколатли органни хабардор қилмасдан, қурилиш ишлари амалга оширилган объектларга оид маълумотлар билан бўлишди.

Хусусан, маълум қилинишича, Бўстонлиқ тумани «Дўстлик» МФЙ ҳудудида амалга оширилаётган мониторинглар жараёнида «Энерго техника грант» МЧЖ томонидан тегишли шаҳарсозлик ҳужжатларини расмийлаштирмасдан Вазирлар Маҳкамасининг 2019 йил 28 ноябрдаги 961-сонли қарорлари талабини бузиб, ҳудудий инспекцияни хабардор қилмасдан, учта 4 қаватли турар жой биноларида ўзбошимчалик билан қурилиш-монтаж ишлари олиб бораётгани аниқланган. МЧЖ фаолиятида қисқа муддатли текшириш ўтказиш тўғрисида Тошкент вилояти қурилиш соҳасида назорат инспекциянинг 2020 йил 23 декабрдаги 279-сонли буйруғи асосида 1 кунлик текшириш ўтказилган.

Қисқа муддатли текшириш натижасига кўра, ишга оид бўлган барча ҳужжатлар ўрнатилган тартибда расмийлаштирилган ва ҳуқуқбузарликка йўл қўйган масъул шахсга нисбатан маъмурий баённома тузилиб, ҳуқуқбузардан тушунтириш хати ва тилхат олиниб, қонунчиликда белгиланган тартибда чора кўриш юзасидан Жиноят ишлари бўйича Бўстонлиқ туман судига ҳужжатлар тўплами тақдим қилинган.

Фирма Маъмурий жавобгарлик тўғрисидаги кодекснинг 99-моддаси 7-қисми билан жавобгарликка тортилган. Тегишли чора кўрилганидан кейин ҳам «Энерго техника грант» МЧЖ томонидан қурилиш-монтаж ишлари тўхтатилмаган ҳамда белгиланган тартибда инспекциядан рўйхатдан ўтиш учун тегишли ҳужжатлар расмийлаштирилмаган.

Шунингдек, Қуйи Чирчиқ тумани «Ойдинобод» МФЙ ҳудудида амалга оширилган мониторинглар жараёнида «Рус Бек» МЧЖ томонидан тегишли шаҳарсозлик ҳужжатларини расмийлаштирмасдан, ҳудудий инспекцияни хабардор қилмасдан савдо ва маиший хизмат кўрсатиш комплексида қурилиш-монтаж ишлари олиб борилаётганлиги аниқланган.

Рухсат ҳужжатлари мавжудлиги ва шаҳарсозлик меъёрлари ҳамда қоидаларига риоя қилиниши юзасидан қисқа муддатли текшириш олиб борилиб, аниқланган ҳуқуқбузарликларни бартараф этиш бўйича хўжалик юритувчи субъектнинг «Рус Бек» МЧЖ фаолиятида қисқа муддатли текшириш ўтказиш тўғрисида инспекциянинг 2020 йил 23 декабрдаги 278-сонли буйруғи асосида 1 кунлик текшириш ўтказилган.

Унга кўра ҳуқуқбузарликка йўл қўйган масъул шахсга нисбатан маъмурий баённома тузилиб, ҳуқуқбузардан тушунтириш хати ва тилхат олиниб, қонунчиликда белгиланган тартибда чора кўриш юзасидан Жиноят ишлари бўйича Чиноз туман судига ҳужжатлар тўплами тақдим қилинган. МЧЖ тегишли чора кўрилганидан кейин ҳам қурилиш-монтаж ишларини тўхтатмаган ҳамда белгиланган тартибда инспекциядан рўйхатдан ўтиш учун тегишли ҳужжатлар расмийлаштирмасдан, қурилиш монтаж ишлари давом эттирмоқда.

Бундан ташқари, Чиноз тумани «Яллама» МФЙ ҳудудида амалга оширилган мониторинглар жараёнида Euroazia transportion and logistik company МЧЖ ҚК томонидан тегишли шаҳарсозлик ҳужжатларини расмийлаштирмасдан Вазирлар Маҳкамасининг 2019 йил 28 ноябрдаги 961-сонли қарорлари талабини бузиб, ҳудудий инспекцияни хабардор қилмасдан, божхона терминалининг қурилиш-монтаж ишлари олиб борилаётганлиги аниқланган.

МЧЖ масъул шахсига нисбатан маъмурий баённома тузилган, ҳуқуқбузардан тушунтириш хати ва тилхат олиниб, қонунчиликда белгиланган тартибда чора кўриш юзасидан Жиноят ишлари бўйича Бўстонлиқ туман судига ҳужжатлар тўплами тақдим қилинган ва Маъмурий жавобгарлик тўғрисидаги кодекснинг 99-моддаси 7-қисми билан жавобгарликка тортилган.

Тегишли чора кўрилганидан кейин ҳам МЧЖ ҚК томонидан қурилиш-монтаж ишлари тўхтатилмаган ҳамда белгиланган тартибда инспекциядан рўйхатдан ўтиш учун тегишли ҳужжатлар расмийлаштирмасдан, қурилиш монтаж ишлари давом эттирилмоқда.

«Қурилиш вазирлиги ҳамда ҳудуддаги қурилиш соҳасида назорат инспекциялари томонидан ҳамиша ноқонуний ва сифатсиз қурилмалар барпо этаётган шахсларга нисбатан тегишли чоралар кўрилган, аммо бундан ўзига керакли хулоса чиқармай, масъулиятни ҳам унутиб, талабга жавоб бермайдиган биноларни қуришда давом этишмоқда. Юртимизнинг бошқа ҳудудларида ҳам булар каби турар жойлар бисёр ва биз улар ҳақида маълумот беришда давом этамиз. Ўйлаймизки, худди шундай хатога йўл қўйиб, бошқаларнинг хавфсизлиги ҳақида унутаётганлар ўзларига тегишли хулоса чиқариб олишади», — дейилади хабарда.