Самарқанд вилояти Нуробод туманида қурилиш компанияси фуқароларнинг омбудсманга мурожаатидан сўнг етказилган зарарни қоплаб берди. Бу ҳақда Олий Мажлиснинг Инсон ҳуқуқлари бўйича вакил ахборот хизмати хабар берди.
2022 йилнинг 18 май куни Олий Мажлиснинг Инсон ҳуқуқлари бўйича вакилнинг (омбудсманнинг) Самарқанд вилоятидаги минтақавий вакили Диёр Хусановга Нуробод тумани, «Наврўз» МФЙдаги кўп қаватли уйда яшовчи 3 нафар фуқаро Р.С., Я.Н. ва А.С. мурожаат қилган.
Улар ўз мурожаатида «Наврўз» МФЙда жойлашган мурожаатда кўрсатилган кўп қаватли уй 2021 йил декабрь ойида қурилиб фойдаланишга топширилганига қарамай, қисқа вақт ичида хонадонларнинг девор, ҳаммом ва ошхона қисмлари яроқсиз ҳолатга келиб қолганини билдирган.
Омбудсманнинг Самарқанддаги минтақавий вакили мурожаатни жойига чиқиб ўрганганида, ҳақиқатдан фуқароларнинг эътирозлари ўринли эканига гувоҳ бўлган.
Вакил ушбу мурожаат бўйича буюртмачи «Қишлоқ қурилиш инвест» инжиниринг компаниясига тегишли тартибда хат юбориб, унда бажарилган сифатсиз қурилиш ишларни дархол тартибга келтириш акс ҳолда Омбудсман томонидан фуқаролар манфаатини кўзлаб судга моддий ва маънавий зарар ундириш бўйича даъво ариза киритилишини қайд этган.
Шундан сўнг, буюртмачи «Қишлоқ қурилиш инвест» инжиниринг компанияси ходимлари мурожаатни жойига чиқиб ўрганиб, объектдаги мавжуд камчиликларни бартараф қилган ва фуқароларга етказилган зарарларни ҳам қоплаб берган.
Аввалроқ монопол корхоналарнинг 3,6 млрд сўмдан ортиқ асоссиз даромади истеъмолчилар фойдасига қайта ҳисоб қилингани, Тошкентда Spark’нинг бўёқлари сифатсиз чиққани боис янгисига алмаштириб берилгани тўғрисида хабар берилганди.
Изоҳ (0)