Тошкент шаҳрининг Олмазор тумани Сағбон кўчасида жойлашган “Қорасарой” турар жой мажмуаси аҳолиси ҳудудда маҳаллий аҳоли норозилигига сабаб бўлувчи, қурилиш меъёрлари қўпол равишда бузилган ҳолда кўп қаватли уй-жойлар қурилаётганидан норози бўлмоқда. Аҳолининг “Дарё”га билдиришича, ушбу қонунбузарлик юзасидан 2024 йил 4 октябрда Тошкент туманлараро судининг ушбу қурилишни тўхтатиш ҳақида расмий ажрими ҳам чиққан.
Биз Тошкент шаҳар туманлараро маъмурий судига мурожаат қилганимиздан сўнг, суднинг 2025 йил 21 февралдаги қарори билан архитектура ва шаҳарсозлик кенгаши ишчи органининг 2024 йил 15 июлдаги лойиҳа-смета ҳужжатларини келишиш бўйича хулосаси ҳақиқий эмас деб топилди. Яна бир муҳим ҳужжат — Тошкент шаҳар маъмурий суди 2025 йил 20 март куни қурилишни тўхтатиш бўйича алоҳида кўрсатма берди. Туман МИБ ходими ва ГАСН томонидан “Ал-Ҳадид” МЧЖга қурилишни тўхтатиш ҳақида ёзма кўрсатма берилишига қарамай, қонунга хилоф қурилиш ишлари давом этмоқда. Нима учун қурувчи ташкилот суд қарорларини бажармаяпти? Нега давлат назорат органлари суднинг қонуний ҳужжатлари ижросига етарли эътибор қаратмаяпти? Наҳотки, Ўзбекистонда суд қарорлари бажарилмаслиги ва қонунларга риоя қилинмаслиги мумкин бўлса?, дейди мурожаатчилар.
Аҳолининг билдиришча, кўп қаватли уй қураётган тадбиркорда қурилишга рухсат берувчи ҳужжатлари йўқ.
Нима учун ноқонуний қурилиш деб атаяпмиз? Чунки икки йил олдин булар дабдурустдан қурилишни бошлашганди. Шунда биз норозилик билдирдик. Ҳужжатлари бор ёки йўқлигини сўрадик. Ҳеч қандай ҳужжат кўрсата олишмади. Кейинчалик бу иш бўйича давлат ташкилотларига мурожаат қилдик. Жавобларда бу қурилиш бўйича шаҳарсозлик кенгашидан рухсат олинмагани маълум бўлди. Ундан кейин яна бир неча маротаба матбуотга чиқишларимиздан кейин ГАСН деган давлат ташкилоти келиб уларга ёзма кўрсатмалар берди. Қурилиш ишлари тўхтатилди. Биз уларни судга бердик ва ноқонуний қуриб қўйилган қурилмаларни бузишни талаб қилдик. Судда шаҳарсозлик кенгашининг қарори бекор бўлди. Лекин шунга қарамасдан қурилишлар давом этмоқда. Қурилишни тўхтатиш бўйича суднинг ажрими бор. МИБга юклатилган. Лекин шунга қарамасдан қурилишлар давом этиб келмоқда, дейди аҳоли вакиллари.
Мурожаатчилар ҳудудда олиб борилаётган қурилиш маҳаллага кириб-чиқиш йўлларининг тирбанд бўлишига сабаб бўлаётганини билдирди.
Маҳалламизга кириб-чиқишда шу қадар машина кўпки, бу ноқонуний қурилиш тирбандлик яна ортишига олиб келмоқда. Эрталабдан тирбандлик, машиналар сигнал беради, бу дегани биз фақат шанбада, ҳафта охирида дам олишимиз мумкин, дейди яна бир мурожаатчи.
Мурожаатчилар қурилиш ташкилотини судга ҳам берган.
Биз бу қурилиш ташкилотини судга бердик. Эътирозларимиз судда кўриб чиқилди. Суд қурилишни тўхтатишни буюрди. Аммо қурилиш давом этмоқда. Рухсатнома бекор қилинди. Мажбурий ижро суд қарорини ижроси таъминотида сусткашликка йўл қўймоқда, дейди улар.
Маълум бўлишича, аҳоли ноқонуний деб атаётган қурилиш ишлари 2023 йил бошланган.
Бу ноқонуний қурилиш 2023 йилда бошланган. Қурилиш ишлари тинчимизни бузгач, бунга эътироз қилдик. Аслида қонунчилик бўйича қурилиш бошлашдан олдин ҳамма рухсатнома ҳужжатларини олиб, фуқаролар билан ҳам муҳокама қилиниши керак эди. Қонунчиликда ҳам шундай. Шаҳарсозлик кодексида ҳам, янги Конституциямизда ҳам бу ёзиб қўйилган. Шаҳарсозликка оид лойиҳалар жамоатчилик билан муҳокама қилиниши шарт. Бу оператив норма, уни ҳеч ким бекор қилгани йўқ. Бошланганидан кейин фуқаролар норози бўлиб чиқдик ва тўхтатдик. Ҳеч қандай ҳужжат йўқлиги маълум бўлди. Кейин биз судга бердик. Қурилиш вазирлиги ҳузуридаги инспекция келиб ўрганди. Энг ёмони кўп ўтмай ноқонуний қурилишни қонунийлаштириб, шаҳарсозлик кенгашига хулоса ҳам беришибди. Кейин биз буни билиб қолиб, судга бердик. Маъмурий судда қурилишни тўхтатиш ҳақида ажрим чиқди. Аммо суд қарори ижроси таъминланмаяпти. Қурилиш ишлари тўхтагани йўқ, дейди аҳоли вакиллари.
Мурожаатчилар Қурилиш вазирлигини вазиятга бепарво қарашда айбламоқда.
Қурилиш вазирлигига бу ҳақда мурожаат қилсак, бу бизнинг ишимиз эмас дейди. Нега вазирлик масъулиятдан қочяпти? Кейин матбуотда чиқишга мажбур бўлдик. ГАСН деган ташкилотга бордик. Борсак, раҳбари бизни қабул қилишни хоҳламади. Саволимизга аниқ жавоб йўқ. Уларга кўра бу масала билан фақат МИБ шуғулланиши керак экан. Ўзбекистонда ноқонуний қурилишлар билан Қурилиш вазирлигидан бошқа яна қайси ташкилот шуғулланиши мумкин?, дейди мурожаатчилар.
Қурувчи ташкилот “Ал-Ҳадид” масъуллари “Дарё”нинг бу ҳақдаги саволига жавоб берар экан, қонуний ҳужжатлари борлигини айтишди, аммо уни тақдим қилмади. Шунингдек, журналистнинг барча саволларига жавоб беришларини ҳам ваъда беришди. Бироқ ваъда ваъдалигича қолди. Қурилиш ва уй-жой коммунал хўжалиги соҳасида назорат қилиш инспекцияси ахборот хизмати раҳбари Бобур Эгамназаров ҳам “Дарё” сўровини жавобсиз қолдирди.
Изоҳ (0)