Олмаота суди сўнгги йиллардаги энг шов-шувли ва узоқ давом этган ишлардан бири — 13 киши ҳалок бўлган ҳостелдаги ёнғин бўйича ишни кўриб чиқишни якунлади. Бу ҳақда Казинформ агентлиги хабар бермоқда.
Маълум қилинишича, тергов ва суд жараёни қарийб 9 ой давом этган. Суд ҳостел директори Адилбек Муҳамедияров ва ёнғин сигнализациясини ўрнатган компания эгаси Александр Пекелникни айбдор деб топган.
Аниқланишича, Муҳамедияров турар жой биносининг биринчи қавати ва ертўласини ноқонуний равишда меҳмонхонага айлантирган. Ваҳоланки, ҳужжатларга кўра, бино фақат дўкон учун мўлжалланган бўлган. Бинода вентиляция мавжуд бўлмаган, тор йўлакка тўшаклар ёйиб қўйилган. Натижада улар биринчи бўлиб ёниб, эвакуация йўлини тўсиб қўйган.
“Агар Муҳамедяров тўшакларни ертўла қаватининг шамоллатилмайдиган йўлагига жойлаштирмаганида, улар ёниб кетмаган ва ёнғин содир бўлмаган бўларди. Шу сабабли, судланувчи Муҳамедяровнинг ёнғинда ундан бошқа ҳамма айбдор, деган даъволарини суд ҳимояланишнинг танланган усули сифатида баҳолайди”, деди судья Ернар Қосимбеков.
Суд ҳукмига кўра, Мухамедяров ёнғин хавфсизлиги қоидаларини бузиб, эҳтиётсизлик ортидан икки ва ундан ортиқ шахснинг ўлимига сабабчи бўлганликда айбдор деб топилиб, 5 йилга озодликдан маҳрум этилган.
Иккинчи айбланувчи ёнғин сигнализацияси тизимини ўрнатиш учун жавобгар бўлган Александр Пекелник эса сигнализация ўрнатиш ишларини назорат қилмаган ва сифатсиз қурилмалардан фойдалангани учун айбдор деб топилиб, тўрт йилга озодликдан маҳрум қилинди.
“Мен ҳостел учун ҳеч нарса қилмаганман. Бу ерда айтилганларнинг барчаси ҳостел учун эмас, балки бошқа мақсадда қилинган. ҳостел учун буларнинг ҳаммасини қайта қуриш керак эди. Бу ишлар ўша пайтда фойдаланилмаётган бўш хона учун қилинган”, деди Пекелник судда.
ҳостелдаги ёнғин бир ярим йил олдин 2023 йилнинг ноябрь ойида содир бўлган эди. Ёнғин вақтида ичкарида 72 киши бўлган. Ёнғинда 13 киши ҳалок бўлган — тўққиз нафари қозоғистонлик, икки нафари россиялик ва икки нафари ўзбекистонлик. Уларнинг барчаси ис газидан заҳарланган. Тергов версиясига кўра, ёнғин ёниб кетган ортопедик тўшакдан бошланган.
Суд ҳукмига кўра, судланувчилар ҳалок бўлганларнинг оилаларига маънавий зарар учун 7 миллион тенгедан тўлаши керак.
Изоҳ (0)