Украинанинг Одесса шаҳрида қурбонлар сони 14 кишига етди. Бу ҳақда Одесса вилояти ҳарбий раҳбари Олег Киперга таяниб Anadolu хабар берди.
“Одессада тунги дрон зарбаси оқибатида 14 киши жароҳат олди, улардан 3 таси болалар. 6 нафар ярадор шифохонада қолмоқда, улардан 3 нафари (шундан бир нафари бола) оғир аҳволда. Қолганлар амбулатор даволанишда давом этмоқда”, деди Кипер.
Украина ҳарбийларига кўра, ҳаво ҳужумидан мудофаа кучлари 22 та дронни зарарсизлантирган: 21 таси уриб туширилган ва биттаси йўқ қилинган. Шунингдек, ҳужумнинг асосий йўналиши Одесса вилояти экани айтилмоқда. Украина Фавқулодда вазиятлар хизмати Одессада 21 қаватли турар жой биносига зарба берилгани ҳақида хабар берган.
“Зарба натижасида 7, 8 ва 9-қаватларда ёнғин содир бўлган. Одамлар ўз квартираларида қамалиб қолган”, дейилади хабарда.
Одесса мери Геннадий Труханов эр-хотиннинг ўлими ҳақида маълумот берган.
“Қутқарувчилар ҳозиргина дрон зарбаси оқибатида ҳалок бўлган эр-хотиннинг жасадини топди. Қурбонларнинг оила аъзолари ва яқинларига самимий ҳамдардлик билдираман”, деди Труханов.
Изоҳ (0)