Россия ҳукумати 4 та ҳудудга дрон ҳужумлари уюштирилгани ҳақида маълум қилди. Бу ҳақда “Украинская Правда” хабар берди.
Ҳужумлар Липецк вилоятининг Липецк ва Елец шаҳарларида содир бўлган. Липецкда ҳарбий аэродром, Елецда эса аккумулятор заводи жойлашган. Липецк вилояти губернатори Игор Артамонов ҳодисани шундай изоҳлади:
“Дрон ҳужуми оқибатида Елецдаги корхоналардан бирининг автотураргоҳида ёнғин чиққан. Ҳозирда ёнғинга барҳам берилган. Яқин атрофдаги корхона ходимлари эвакуация қилинган. Дастлабки маълумотларга кўра, қурбонлар ва жабрланганлар йўқ”.
Губернатор айнан қайси корхона назарда тутилаётганига аниқлик киритмаган. Бироқ дрон ҳужумлари содир бўлаётгани ҳақидаги маълумот турли ҳудудлардан келаётгани айтилган.
Артамоновга кўра, дроннинг бўлаклари Липецкдаги хусусий турар жой биносига қулаган. Оқибатда бир киши ҳалок бўлган, яна 2 киши жароҳатланган. Шунингдек, яна бир дрон Елецда қурилаётган кўп қаватли уйга қулаб тушган.
Таъкидланишича, дронлар Елецдаги аккумулятор, дрон, шунингдек, авиация ва денгиз флоти учун аккумуляторлар ишлаб чиқарадиган “Энергия” ОАЖ заводига ҳужум қилган. Бу заводга 23 майга ўтар кечаси ҳам ҳужум қилинган эди. Липецкда Россиянинг ҳарбий аэродроми жойлашган бўлиб, ҳудудда Су-34, Су-35 ва МиГ-31 самолётлари жойлашган. Унга 2024 йил август ойида ҳам зарба берилганди.
Дрон ҳужуми ҳақида Воронеж губернатори Александр Гусев ҳам маълум қилган. Унга кўра, Воронеж шаҳрида уриб туширилган дрон қисмларининг қулаши оқибатида уйнинг томи шикастланган, электр тармоғи узилгани сабаб бир қишлоқ электр таъминотисиз қолган.
Россия Мудофаа вазирлиги 3 июль куни эрталаб ҳаво ҳужумидан мудофаа тизимлари “69 та Украина дронини” йўқ қилгани ҳақида хабар берган. Хусусан, Белгород вилояти устида 27 та, Воронежда 22 та, Липецкда 10 та, Россиянинг Курск вилояти устида 8 та ва Қримда 2 та учувчисиз учиш аппарати уриб туширилган.
Изоҳ (0)