Амазон асосчиси Жефф Безос ва собиқ тележурналист Лорен Санчеснинг Венецияда бўлиб ўтган тўйи Италия бюджетига 957 миллион евро (1 129 250 минг АҚШ доллари) миқдорида даромад келтирди. Бу ҳақда Reuters нашри мамлакат Туризм вазирлиги маълумотларига таяниб хабар берди.
Дабдабали тўй маросими 26–28 июнь кунлари Венецияда ўтказилди ва ўша ҳафта ичида энг кўп муҳокама қилинган воқеалардан бирига айланди. Турли ОАВ тўй дастурининг тафсилотлари, таниқли меҳмонлар ва маросимни бекор қилишга уринган маҳаллий аҳолининг норозилик намойишларини кенг ёритди.
Италия Туризм вазирлигининг расмий ҳисоб-китобига кўра, Безоснинг тўйи Венециянинг бир йиллик туризм даромадининг 67 фоизига тенг бўлган фойда келтирган. Вазирлик ушбу тадбирни жуда муҳим деб атади, чунки 2025 йилда шаҳарда сайёҳлар оқими сезиларли даражада камайган эди.
“Безоснинг тўйи Италиянинг халқаро туризм соҳасида тобора муҳим рол ўйнаётганининг яққол исботи бўлди. Бундай тадбирлар мамлакатимизнинг глобал обрўсини мустаҳкамлаб, янги иш ўринлари яратади, диққатга сазовор ҳудудларни тарғиб қилади ва қимматли сайёҳлар оқимини жалб этади”, деди Италия туризм вазири Даниэла Сантанке.
Аввалроқ тўйга бир кун қолганда 61 ёшли Жефф Безос ва 55 ёшли Лорен Санчес никоҳ маросими муносабати билан меҳмонлардан уларга совға бермасликни ва бунинг ўрнига тарихий шаҳарга хайрия қилишини сўраган эди, чунки шаҳарнинг кўплаб аҳолиси бу тадбирга салбий муносабат билдирган эди.
Изоҳ (0)