АҚШ президенти Дональд Трамп 1 июль куни Исроил Ғазода ўт очишни тўхтатишнинг “зарур шартларига рози бўлганини” маълум қилди. Бу ҳақда CNN хабар берди.
ҲАМАСнинг эса шартларни қабул қилиши номаълумлигича қолмоқда. АҚШ ва Исроил маъмуриятига кўра, ҲАМАС келишувга барибир рози бўлади. Трамп Truth Social’даги постида гуруҳнинг розилигини олишга Қатар ва Миср ёрдам беришини айтган.
“Менинг вакилларим бугун Ғазода исроилликлар билан узоқ ва самарали учрашув ўтказди. Исроил 60 кунлик ўт очишни тўхтатишнинг зарур шартларга рози бўлди. Бу вақт ичида биз урушни тугатиш учун барча томонлар билан ишлаймиз. Тинчлик ўрнатилишига кўмаклашаётган Қатар ва Миср якуний келишувни етказиб беради. Умид қиламанки, Яқин Шарқ манфаати учун ҲАМАС бу келишувни қабул қилади. Чунки ҳолат яхшиланмайди — фақат ёмонлашади”, деган Трамп ўз постида.
Қатар расмийлари 1 июль куни ҲАМАСга ҳам, Исроилга ҳам Трамп томонидан қўллаб-қувватланаётган 60 кунлик ўт очишни тўхтатиш таклифини тақдим этган. Ушбу таклиф президент Дональд Трампнинг махсус вакили Стив Уиткофф бошчилигидаги бир неча ойлик яширин саъй-ҳаракатлардан сўнг ишлаб чиқилган. Таклиф этилаётган келишувда ҲАМАСнинг ҳам манфаатлари ҳисобга олинган. Унга кўра, исроиллик гаровга олинганлар фаластинлик маҳбуслар эвазига озод қилинади.
Трамп 30 июнь куни Исроил бош вазири Биньямин Нетаньяху билан учрашиши режалаштирилганди. Унда ўт очишни тўхтатиш ёки Ғазога ҳужумларни кучайтириш масаласи кўриб чиқилиши керак эди. Яҳудий давлати вакили 1 июль куни Исроил урушда барча мақсадларига тўлиқ эришмаганини ва ҲАМАС кучлари қисқариб, яшириниб олгани сабабли уларни нишонга олиш қийинлашганини билдирган.
Изоҳ (0)