АҚШ президенти Ғазо шаҳри Фаластин халқига тегишли эканини тан олиши керак. Акс ҳолда, Яқин Шарқдаги можаро ҳал этилмайди. Туркия президенти Ражаб Тоййиб Эрдўғон тегишли баёнот берди.
Сиёсатчи Ар-Риёдда бўлиб ўтган Ислом ҳамкорлик ташкилоти саммитидан сўнг Ғазодаги вазият бўйича гапирди.
“Мусулмонлар ўлдирилганда БМТ ва бошқа халқаро ташкилотларнинг самарасиз ва кўр эканига яна бир бор гувоҳ бўлдик. Халқаро ҳамжамият Ғазодаги қирғинларга қарши чора кўриши керак. Бироқ БМТ Хавфсизлик кенгашининг яна фаол эмаслигини кўрмоқдамиз”, — деди Эрдўғон.
Шунингдек, у Исроил—Фаластин можаросида АҚШнинг позициясини танқид қилиб, Вашингтон секторни Исроил ҳудуди деб ҳисобласа, Туркия ва АҚШ ўртасида Ғазо бўйича келишувга эришиб бўлмаслигини айтди.
“Фаоллаштирилиши керак бўлган энг муҳим давлат — Исроилга таъсири бўлган Америка... Ғазо — Фаластин халқининг ери. Америка буни тан олиши керак. Агар Байден Ғазо Фаластин халқининг ери эмас, лекин кўчманчилар ёки Исроилники, деган ёндашувга эга бўлса, бизнинг келишувимиз имконсиз”, — деди Эрдўғон.
Унинг сўзларига кўра, “бир қатор давлатлар ҳукумати ўзларининг империалистик манфаатлари йўлида Исроилни оқлашга интилаётган бўлсалар-да, уларнинг жамиятлари назарида Исроил болаларнинг қотили бўлган мамлакатдир”.
Эрдўғон яна бир бор Фаластиннинг ҲАМАС ҳаракати “террорчи ташкилот эмас, балки ўз ерларини ҳимоя қилиш ва ватани учун бор кучи билан курашаётган одамлар” эканини айтди. У Туркиянинг минтақадаги ролига ҳам тўхталиб ўтди.
“Ушбу географияда Туркияни ҳисобга олмасдан туриб, ташаббус кўрсатиш ёки режалар тузиш мумкин эмас. Минтақамиз ўн минглаб километр узоқликда жойлашган ва бу ерда ўз таъсирини ўрнатмоқчи бўлган давлатлардан зудлик билан халос бўлиши керак”, — деди Туркия раҳбари.
Изоҳ (0)