“АҚШ Исроилни қўллаб-қувватлайди, лекин шу билан бирга, Ғазо аҳолисининг азоб-уқубатларига барҳам беришга интилмоқда” — Блинкен

АҚШ Исроилни қўллаб-қувватлайди, лекин айни пайтда Ғазо халқининг “даҳшатли азоб-уқубатларини” тугатишга интилади.

Бу ҳақда АҚШ давлат котиби Энтони Блинкен маълум қилди.

“Биз Исроилнинг 7 октябрда содир бўлган воқеа ҳеч қачон такрорланмаслигини таъминлаш борасидаги саъй-ҳаракатларини қатъий қўллаб-қувватлаймиз. Лекин шу билан бирга, биз Ғазо аҳолиси ҳар куни кўраётган даҳшатли азоб-уқубатларга барҳам бериш учун қўлимиздан келганини қилишга қарор қилдик”, — деди Блинкен Саудия Арабистонида бўлиб ўтган Жаҳон иқтисодий форуми тадбирида.

АҚШ давлат котиби, шунингдек, Қўшма Штатлар Исроилнинг Ғазо секторидаги Рафаҳ шаҳрида ўтказиши мумкин бўлган операциясини қўллаб-қувватламаслигини, чунки бу режа тинч аҳолини ҳимоя қилишни ўз ичига олмаганини айтди.

“Биз Исроилнинг Рафаҳдаги йирик ҳарбий операциясини қўллаб-қувватлай олмаймиз”, — деди у Саудия Арабистонидаги Жаҳон иқтисодий форуми тадбирида.

Америка дипломатияси раҳбарининг таъкидлашича, Вашингтон операция давомида “тинч аҳоли ҳимоя қилинишини ишонарли тарзда айтадиган режани ҳали кўрмаган”.