Исроил армияси 1 июль куни Ғазо жанубидаги Хон Юнус ва Рафаҳ шаҳарларидан аҳолининг бир қисмини эвакуация қилиш тўғрисида буйруқ чиқарди. Бу ҳақда Al Arabiya нашри хабар берди.
Ҳарбийлар Ғазо жанубидаги аҳоли пунктларига огоҳлантириш юбориб, ҳудудни тарк этишни буюрган. Ушбу баёнотдан сўнг минглаб фаластинликлар шимолга қараб қоча бошлаган.
Рафаҳдаги Ал-Қарара, Бани Суҳайла ва яна иккита аҳоли пунктларида умумий эвакуация бошланган. Аҳоли тартибсиз равишда қочқинлар лагерларини тарк этган.
Ушбу янги эвакуация дастури Хон Юнус ҳудудидан Исроилга 20 та снаряд улоқтирилиши билан боғлиқ экани хабар қилинган. Исроил ҳарбийлари снарядлар ким томонидан улоқтирилганини аниқлай олмаган ва эвакуация режаси ишлаб чиққан.
Фаластиннинг “Ислом жиҳоди” гуруҳи ҳужум учун жавобгарликни ўз зиммасига олган. Бунга жавобан Исроил Рафаҳ ва Ғазо шарқига ҳаво ҳужумлари уюштира бошлаган.
“Эвакуация буйруғи берилганидан кейин одамларни қўрқув ва ҳаддан ташқари хавотир қамраб олди. Аҳолининг катта қисми кўчиб кетди”, — деган Бани Суҳайла шаҳрида яшовчи Аҳмад Нажжар исмли шахс.
Тель-Авив расмийлари эвакуация оқибатида қанча фаластинлик ҳудудни тарк этганини маълум қилмаган. Рафаҳ жанубига қўшимча ҳарбий қисмлар ва танклар олиб кирилган.
Изоҳ (0)