Исроил армияси Ғазо секторида ёрдам кутаётган тинч аҳолига қарата ўт очиши оқибатида камида 20 фаластинлик ҳалок бўлди, юзлаб одамлар яраланди. Бу ҳақда Anadolu хабар берди.
Ғазодаги Соғлиқни сақлаш вазирлиги баёнотига кўра, Исроил қўшинлари эксклавнинг турли қисмларида ташкил этилган гуманитар ёрдам тарқатиш пунктлари яқинида бўлган фаластинликларни нишонга олган. Дастлабки маълумотларга кўра, ҳужумлар оқибатида камида 20 киши ҳалок бўлган, 200 дан ортиқ киши жароҳатланган, улардан 50 нафарининг аҳволи оғир.
Вазирлик барча манфаатдор томонларни “оч қолган одамлар орасида ўлим ва оғир жароҳатларнинг олдини олиш учун” ёрдам етказишнинг бошқа механизмларини топишга чақирган. Баёнотда, шунингдек, Исроил армияси Хон Юнус шаҳрининг ал-Меваси ҳудудида Халқаро Қизил Хоч қўмитасига қарашли дала госпиталини ўққа тутгани қайд этилган.
Шифохонадаги беморлар, ярадорлар ва тиббиёт ходимларининг ҳаёти хавф остидалиги айтилмоқда. Соғлиқни сақлаш вазирлиги Исроилнинг тиббиёт муассасаларига ҳужумларини қоралаган.
27 майдан ҳозирги кунгача Исроил ва АҚШ томонидан гуманитар ёрдам зоналарида мунтазам равишда уюштирилган ҳужумлар натижасида камида 274 фаластинлик ҳалок бўлиб, яна 2 532 нафари яраланган.
2023 йил 7 октябрда Ғазо секторида оммавий ҳужумлар бошланганидан бери камида 55 362 киши ҳалок бўлган ва 128 741 киши яраланган.
Изоҳ (0)