Айни вақтда бошоқли дон экинларидан бўшаган далаларда сомон поялари ва бошқа органик қолдиқларни ноқонуний тарзда ёқиб юбориш билан боғлиқ кўплаб ҳолатлар кузатилмоқда. Бу ҳақда “Ўзбеккосмос” агентлиги хабар берди.
Маълум қилинишича, агентликнинг Давлат космик мониторинги дастури доирасида олиб борилган кузатишлар натижасида июнь ойининг бугунги кунига қадар Республиканинг 10 та вилоятида 639 та мана шундай салбий ҳолат бўйича 5350 гектар майдон ноқонуний тарзда ёқиб юборилган. Космик таҳлиллар ҳудудлар кесимида қуйидагича тақсимланган:
- Тошкент вилоятида 27 та ҳолат 413,5 гектар;
- Сирдарё вилоятида 32 та ҳолат 341,9 гектар;
- Жиззах вилоятида 7 та ҳолат 74,9 гектар;
- Бухоро вилоятида 16 та ҳолат 96,3 гектар;
- Андижон вилоятида 248 та ҳолат 2345,7 гектар;
- Фарғона вилоятида 13 та ҳолат 66,2 гектар;
- Наманган вилоятида 3 та ҳолат 36,7 гектар;
- Сурхондарё вилоятида 253 та ҳолат 1823 гектар;
- Хоразм вилоятида 31 та ҳолат 99,5 гектар;
- Қорақалпоғистон Республикасида 9 та ҳолат 52 гектар.
Мазкур вазиятлар бўйича ахборотлар Бош прокуратура, Экология вазирлиги ҳамда бошқа тегишли идораларга юборилган.
Маълумот учун, бошоқли дон экинларидан бўшаган майдонларни тез ва арзон йўл билан йўқ қилиб юборишга бўлган ҳаракат МЖтКнинг тегишли моддаси билан БҲМнинг 10 баробаригача (3 млн 750 минг сўмгача) жарима қўлланилишига сабаб бўлади. Зарар миқдори катта бўлган тақдирда жиноий жавобгарликкача олиб бориши мумкин.
Ўзбекистонда 2024 йилнинг 6 ойида 23,3 минг гектарлик бошоқли дон экинларидан бўшаган ер майдонлари ёқиб юборилгани ҳақида хабар берилганди.
Изоҳ (0)