Сирдарё вилоятида Сайхунобод туманида дарахт кесиши оқибатида табиатга қарийб 1,5 миллиард сўм зарар етказганлар икки йилга қамалди. Бу ҳақда Экология вазирлиги хабар берди.
Маълум қилинишича, М.А. шериклари билан олдиндан тил бириктириб, 2023 йилнинг декабрь ва 2024 йилнинг январь ойларида ўзига қарашли бўлган дала майдони четида кўкариб турган жами 21 туп қайрағоч дарахтини қонунга хилоф равишда кесиб, сотиб юборгани аниқланган. Уларга нисбатан Жиноят кодексининг 198-моддаси 2-қисми билан жиноят иши қўзғатилган.
Дарахтлар кесилиши натижасида табиатга 1 миллиард 459 миллион 144 минг сўм зарар етказилган. Судда М.А, А.А. ва К.З.нинг 21 туп қайрағоч дарахтини қонунга хилоф равишда кесиб, сотиб юборгани ўз исботини топди. Суд қарори билан дарахт кушандаларидан табиатга етказилган зарар ундирилиши белгиланди.
Шунингдек, ҳар бир судланувчига 2 йилдан озодликдан маҳрум қилиш жазоси тайинланди.
Изоҳ (0)