Жиззахда фермер хўжалиги ходими ўсишдан тўхтамаган 42 туп қайрағочни кесиб ташлади. Бу ҳақда Жиззах вилояти Экология бошқармаси матбуот хизмати хабар берди.
Маълум қилинишича, 11 январь куни Жиззах вилояти Экология, атроф-муҳитни муҳофаза қилиш ва иқлим ўзгариши бошқармасининг Пахтакор туман экология инспекцияси томонидан Пахтакор тумани “Бахмал” SIУ ҳудудида жойлашган “Ювест тоғ” фермер хўжалигининг дала майдони четига ихота мақсадида экилган 42 туп ўсишдан тўхтамаган қайрағоч кесиб кетилгани аниқланган.
Ўрганишлар давомида дарахтлар “Ювест тоғ” фермер хўжалиги иш юритувчиси, Пахтакор тумани “Боғишамол” ҚФЙ яшовчи 36 ёшли Ж.Ж. исмли фуқаро томонидан кесиб олингани маълум бўлган.
Вазирлар Маҳкамасининг “Давлат ўрмон фондига кирмайдиган дарахт ва буталарни экиш, парвариш қилиш ва улардан фойдаланиш талабларини янада такомиллаштириш тўғрисида”ги қарорига асосан қайрағоч дарахтларининг ноқонуний кесилиши натижасида ўсимлик дунёсига 224 миллион 400 минг миқдорида зарар етказилган.
Пахтакор тумани прокуратурасининг қарорига кўра, фуқаро Ж.Ж.га нисбатан Жиноят кодексининг 198-моддаси ( экинзорларни, ўрмонларни, дарахтларни ёки бошқа ўсимликларни шикастлантириш ёхуд нобуд қилиш) 2-қисми билан жиноят иши қўзғатилган. Ҳозирда тергов ишлари давом этмоқда.
Аввалроқ Қашқадарёда канал қирғоғини реконструкция қилиш вақтида 150 та дарахт қўпориб ташлангани, Хоразм вилояти Шовот туманида дарахтлар кесиб, ёқиб юборилиши оқибатида 756 миллион сўм зарар етказилгани тўғрисида хабар берилганди. Шунингдек, Сирдарёда ариқларни бетонлаштириш жараёнида табиатга 232 миллион сўм зарар етказилган эди.
Изоҳ (0)