АҚШ президенти Дональд Трампнинг ҳаракатлари британияликларни терроризм ва Хитойдан кўра кўпроқ ташвишга солмоқда. Бу ҳақда J.L.Partners компанияси ўтказган тадқиқотга асосланиб, Politico нашри хабар берди.
Маълум қилинишича, сўровнома компания томонидан 27-29 май кунлари 2132 киши орасида ўтказилган.
Сўнгги 12 ой ичида британияликларнинг Қўшма Штатларга бўлган ишончи кескин пасайган. Дунёда Америка масъулиятли ҳаракат қилишига ишонаётган британияликларнинг улуши 2024 йилдаги 53 фоиздан 2025 йилда атиги 38 фоизгача тушган.
Газета Трамп Оқ уйга қайтганидан кейин кескин ўзгаришлар юз берганини қайд этган. Сўровда иштирок этганларнинг 33 фоизи АҚШ президенти ҳаракатларини терроризм (32 фоиз) ёки Хитойнинг кучайишидан (25 фоиз) кўра миллий хавфсизликка жиддийроқ таҳдид деб ҳисоблаган.
“Ҳозирда британияликларнинг атиги 31 фоизи АҚШни мамлакатнинг энг яқин иттифоқчиси деб билади. Бу 2024 йилдаги 54 фоиздан 23 фоизга камдир”, дея таъкидланади тадқиқот натижаларида.
Brexit’дан олти йил ўтгач, британияликларнинг 62 фоизи Трампнинг ҳаракатлари сабабли Буюк Британия Европа Иттифоқи билан яқинроқ муносабатлар ўрнатиши керак, деб ҳисобламоқда.
Изоҳ (0)