Буюк Британия қироллик оиласи ҳаётининг барча жабҳаларида қатъий протокол ва анъаналар асосида яшайди. Бу қоидалар фақат расмий маросимларгина эмас, балки кундалик турмуш, жумладан, овқатланиш тартибига ҳам тааллуқлидир. Айниқса, ворис шаҳзодалар ва малика Шарлоттанинг овқатланиш одатлари қатъий назорат остида бўлиб, улар нафақат соғлом ҳаёт тарзи, балки сарой этикети талабларига ҳам мувофиқ шакллантирилади. Қуйида Британия монархиясида амал қилинадиган энг кутилмаган гастрономик чекловлар ва анъаналар билан танишасиз.
Болалар алоҳида, ота-оналар алоҳида овқатланади
Қироллик оиласида кичик ворислар умумий дастурхонга фақатгина маълум ёшга етиб, мулоқот ва дастурхон маданиятини тўлиқ ўзлаштиргачгина қўшилиши мумкин. Шу сабабли малика Шарлотта, шаҳзода Жорж ва шаҳзода Луи одатда болалар хонасида овқатланади. Илгари уларнинг отаси шаҳзода Уилям ва амакиси Гарри ҳам худди шундай тартибда улғайган. Бу қоидага ҳатто байрам кунлари ҳам амал қилинади: Масалан, Янги йил байрами куни ҳам алоҳида болалар дастурхони тайёрланади.
Нималар тақиқланган, нималар рухсат этилган?
Қироллик аъзоларининг овқатланиш рациони қатъий назорат қилинади. Масалан, сарой протоколи бўйича саримсоқ ва аччиқ таомлар қатъиян ман этилган. Бунинг сабаби бундай маҳсулотлардан кейин оғизда қоладиган ёқимсиз ҳиддир.
Бироқ бу чекловлар соғлом овқатланиш тамойилларига зиддият келтирмайди: ошпазлар болалар организми етарли даражада витамин олишини таъминлашга интилади. Ҳатто картошка пюресига ҳам фойдали сабзавотлар аралаштирилади.
Малика Шарлоттанинг севимли таомларидан бири пицадир. Шунингдек, у зайтун меваларини ҳам ёқтиради. Бу жиҳатдан у ўзининг бувиси — марҳума қиролича Елизавета II дан фарқ қилади: қиролича италян таомларини хушламаган.
Катталарга ҳам, болаларга ҳам хом гўшт, хусусан, бифштекс ва ярим пишган стейклар, қисқичбақасимон денгиз маҳсулотлари истеъмол қилиш ман этилган. Чунки улар етарли даражада термик ишланмайди ва инфекциялар олиб келиш хавфи юқори.
Авваллари қандай бўлган?
Уилям ва Кейт ўз фарзандлари Жорж, Шарлотта ва Луини соғлом ва эркин муҳитда тарбиялашга ҳаракат қилади. Улар болаларча эркаланишга ҳам, ошхонада оналарига ёрдам беришга ҳам имкон топади. Кейт ҳар доим ҳам сарой ошпазларига таянмайди: баъзида болалари билан бирга ўзи таом тайёрлайди ва уларни меҳнатга жалб қилади.
“Бири сутни қуяди, бири унни солади, охиргиси ёғни қўшади”, деган эди у бир интервьюсида, болаларнинг пазандачиликдаги иштироки ҳақида гапирар экан.
Марҳума қиролича Елизавета II эса анча талабчан бўлган. Айнан у саримсоқни таомлардан бутунлай чиқариб ташлаган: қиролича пиёзнинг на ҳиди, на таъмига тоқат қилолмаган. Ҳатто Италияга сафар олдидан бу масалада махсус фармойиш ҳам чиқарган.
Умуман олганда, Италия таомлари қиролича Елизаветага ёқмаган: у крахмалли озиқ-овқат маҳсулотларини, айниқса пица ва пастани хушламаган. Уларнинг ҳеч бири ҳеч қачон (!) Букингем саройи менюсида бўлмаган. Сабаби бу таомлар қироллик гастрономик протоколларига мос келмаган. Бундан ташқари, у пастани ва пицани “жирканч” таомлар деб атаган.
Изоҳ (0)