Бугун ва дам олиш кунлари Ўзбекистон ҳудудига жанубдан жуда иссиқ ва қуруқ ҳаво оқимлари кириб келиши давом этади, деб хабар бермоқда “Ўзгидромет”.
Прогнозларга кўра, 18—20 июль кунлари кундузи ҳарорат 40-43 даражагача, жанубда ва чўл ҳудудларда 44-45 даражагача кўтарилади.
Фақат республиканинг шимоли-ғарбий ҳудудларида дам олиш кунлари иссиқ бир оз пасайиши кутилмоқда. Якшанба куни Қорақалпоғистон Республикаси ва Хоразм вилоятида ҳарорат кундузи 35-38 даражани ташкил этади.
Республика бўйича баъзи жойларда шамол тезлиги 13-18 метр/секундгача кучайиши, чанг-тўзон билан кузатилиши мумкин.
Тошкентда асосан булутсиз об-ҳаво кузатилади. Ҳаво ҳарорати кечалари 24-27 даража, кундуз кунлари 40-43 даража атрофида бўлади.
“Ўзгидромет” ҳафтанинг иккинчи ярмида иссиқ кучайишини прогноз қилганди. 18—19 июль кунлари Ўзбекистон ҳудудига жанубдан жуда иссиқ ҳаво оқимлари кириб келиши давом этиши кутилмоқда. Қорақалпоғистоннинг Хўжайли, Тахиатош ва Қораўзак туманларида жазирама иссиқ туфайли мактабгача таълим ташкилотлари ўз фаолиятини вақтинча тўхтатди.
Изоҳ (0)