Ғазодаги шифокорлар сектордаги ёнилғи танқислиги туфайли бир нечта чақалоқни битта инкубаторга жойлаштиришга мажбур бўлди. Бу ҳақда BBC хабар берди.
БМТ секторда “ёнилғининг деярли қўшимча мавжуд захиралар қолмагани” ҳақида огоҳлантирган.
“Шифохоналарда ёнилғи танқислиги мавжуд. Тез ёрдам машиналари тўхтаб қолган. Сув тизимлари ҳалокат ёқасида. Бу шароит келтириб чиқараётган ўлимлар тез орада кескин кўпайиши мумкин. Агар Исроил ҳукумати шошилинч, мунтазам ва етарли миқдорда ёнилғи киришига рухсат бермаса, бу салбий оқибатларга олиб келади”, дейилади БМТ хабарида.
Исроил 2025 йил бошида 11 ҳафта давомида гуманитар ёрдамни блокада қилган. Оқибатда анклавнинг 2 миллиондан ортиқ фаластинлик аҳолиси очарчилик ва чуқурлашиб бораётган гуманитар инқирозга юз тутган. Май ойида қамал қилинган ҳудудга чекланган миқдорда ёрдам етказиб бериш қайта тикланган. Лекин бу эҳтиёжлар кўламини қондириш учун етарли эмаслиги таъкидланган.
Ғазо шаҳри жанубидаги “Ал-Аҳли” касалхонаси директори 9 июль куни ижтимоий тармоқларда битта инкубаторда ётган бир нечта янги туғилган чақалоқларнинг суратини жойлаштирган.
“Бу фожиага нафақат ускуналарнинг етишмаслиги, балки Ғазодаги тинимсиз уруш ва бутун соғлиқни сақлаш тизимини издан чиқарган қамал сабаб бўлган. Қамал эрта туғилган чақалоқларни парвариш қилишни ҳаёт-мамот жангига айлантирди. Ҳеч бир бола бомба ва блокадалар унинг яшаши ёки ўлишини ҳал қиладиган дунёда туғилмаслиги керак”, деб ёзиб қолдирган у.
Шифокорларнинг айтишича, танқислик уларни буйрак диализи бўлимларини ёпишга мажбур қилган. Шунда интенсив терапия ва операцион хоналарида ишлаш имкони мавжуд бўлади.
Агар ёнилғи яқин бир неча соат ичида “Ал-Шифо”га етказиб берилмаса, шифохона 3 соат ичида ишдан тўхтайди. Бу кўплаб ўлимларга олиб келади. Инкубаторлардаги 22 нафар чақалоқ хавф остида, деди доктор Муҳаммад Абу Силмия.
Ёнилғи танқислигидан ташқари, генераторлар қисмларининг етишмаслиги кўпроқ техникаларни ўчириб қўйишга мажбур қилмоқда.
“Шифохоналарнинг генераторларини ишлатиш учун нафақат ёнилғи, балки эскиларини алмаштириш учун эҳтиёт қисмларни топиш ҳам муаммо бўлмоқда”, таъкидлади Ғазо Соғлиқни сақлаш вазирлиги.
Изоҳ (0)