G‘azodagi shifokorlar sektordagi yonilg‘i tanqisligi tufayli bir nechta chaqaloqni bitta inkubatorga joylashtirishga majbur bo‘ldi. Bu haqda BBC xabar berdi.
BMT sektorda “yonilg‘ining deyarli qo‘shimcha mavjud zaxiralar qolmagani” haqida ogohlantirgan.
“Shifoxonalarda yonilg‘i tanqisligi mavjud. Tez yordam mashinalari to‘xtab qolgan. Suv tizimlari halokat yoqasida. Bu sharoit keltirib chiqarayotgan o‘limlar tez orada keskin ko‘payishi mumkin. Agar Isroil hukumati shoshilinch, muntazam va yetarli miqdorda yonilg‘i kirishiga ruxsat bermasa, bu salbiy oqibatlarga olib keladi”, deyiladi BMT xabarida.
Isroil 2025-yil boshida 11 hafta davomida gumanitar yordamni blokada qilgan. Oqibatda anklavning 2 milliondan ortiq falastinlik aholisi ocharchilik va chuqurlashib borayotgan gumanitar inqirozga yuz tutgan. May oyida qamal qilingan hududga cheklangan miqdorda yordam yetkazib berish qayta tiklangan. Lekin bu ehtiyojlar ko‘lamini qondirish uchun yetarli emasligi ta’kidlangan.
G‘azo shahri janubidagi “Al-Ahli” kasalxonasi direktori 9-iyul kuni ijtimoiy tarmoqlarda bitta inkubatorda yotgan bir nechta yangi tug‘ilgan chaqaloqlarning suratini joylashtirgan.
“Bu fojiaga nafaqat uskunalarning yetishmasligi, balki G‘azodagi tinimsiz urush va butun sog‘liqni saqlash tizimini izdan chiqargan qamal sabab bo‘lgan. Qamal erta tug‘ilgan chaqaloqlarni parvarish qilishni hayot-mamot jangiga aylantirdi. Hech bir bola bomba va blokadalar uning yashashi yoki o‘lishini hal qiladigan dunyoda tug‘ilmasligi kerak”, deb yozib qoldirgan u.
Shifokorlarning aytishicha, tanqislik ularni buyrak dializi bo‘limlarini yopishga majbur qilgan. Shunda intensiv terapiya va operatsion xonalarida ishlash imkoni mavjud bo‘ladi.
Agar yonilg‘i yaqin bir necha soat ichida “Al-Shifo”ga yetkazib berilmasa, shifoxona 3 soat ichida ishdan to‘xtaydi. Bu ko‘plab o‘limlarga olib keladi. Inkubatorlardagi 22 nafar chaqaloq xavf ostida, dedi doktor Muhammad Abu Silmiya.
Yonilg‘i tanqisligidan tashqari, generatorlar qismlarining yetishmasligi ko‘proq texnikalarni o‘chirib qo‘yishga majbur qilmoqda.
“Shifoxonalarning generatorlarini ishlatish uchun nafaqat yonilg‘i, balki eskilarini almashtirish uchun ehtiyot qismlarni topish ham muammo bo‘lmoqda”, ta’kidladi G‘azo Sog‘liqni saqlash vazirligi.
Izoh (0)