Украина президенти Владимир Зеленский Озарбайжон раҳбари Илҳом Алиев билан телефон орқали суҳбатлашиб, унга Украина халқи ва мамлакат ҳудудий яхлитлигини қўллаб-қувватлагани учун миннатдорлик билдирди. Бу ҳақда Владимир Зеленский ўзининг Telegram каналида маълум қилди.
Маълум қилинишича, икки давлат раҳбарлари, бошқа масалалар қатори, Москва ва Боку ўртасидаги муносабатларнинг кескинлашувини ҳам муҳокама қилишган.
Зеленскийнинг айтишича, “Россия Озарбайжон фуқароларини ҳақорат қилаётган ва республикага таҳдид солаётган вазиятда” Алиевга ўз қўллаб-қувватлашини билдирганини маълум қилган.
“Украинани, халқимизни ва ҳудудий яхлитлигимизни қўллаб-қувватлагани учун унга миннатдорчилик билдирдим. Шунингдек, Украина томонидан ҳам аниқ қўллаб-қувватлаш ифода этилди”, дея таъкидлади у.
Шунингдек, президентлар мамлакатларнинг икки томонлама муносабатларини, хусусан, энергетика ва гуманитар соҳадаги ҳамкорликни ҳам муҳокама қилишган.
Таъкидланишича, президентлар Иқтисодий ҳамкорлик бўйича ҳукуматлараро қўшма комиссия йиғилишини ўтказишга келишиб олишгандилар.
“Президент Алиев билан фикримиз бир хил: ҳар бир инсоннинг ҳаёти ва қадр-қиммати ҳимоя қилиниши шарт”, дея таъкидлади Зеленский.
Боку ва Москва ўртасидаги муносабатлар 27 июнда Екатеринбургда тергов доирасида этник озарбайжонликлар ҳибсга олинганидан сўнг кескинлашди. Россия Тергов қўмитаси (ТҚ) раиси Александр Бастрикин жиноят ишини ТҚ бош тергов бошқармасига топширишни талаб қилди.
Озарбайжон Ташқи ишлар вазирлиги ушбу рейдлар туфайли Россия Федерациясига “қатъий норозилик” билдирди. Бунга жавобан Россия Ташқи ишлар вазирлиги Бокуда россиялик журналистлар қўлга олинганидан кейин Озарбайжоннинг “дўстона бўлмаган ҳаракатлари” ҳақида баёнот берди.
Изоҳ (0)