Озарбайжон Россия ҳуқуқни муҳофаза қилиш органлари ходимлари томонидан унинг фуқароларини қийноққа солиниб, ўта шафқатсизлик билан ўлдирилиши юзасидан жиноят иши қўзғатди. Бу ҳақда мамлакат Бош прокуратураси хабар берди.
Дастлабки терговга кўра, 27 июнь куни эрталаб Россиянинг Екатеринбург шаҳрида ҳуқуқ-тартибот ходимлари рейд ўтказиб, Озарбайжон фуқароларини жиноятга алоқадорликда гумонлаб, ҳибсга олган. Ҳибсга олинганлар — деярли ҳимоясиз бўлган ҳолатда — қўлга олиш жараёнида, йўлда ва маъмурий биноларда қаттиқ қийноқларга, кўп маротаба оғир жароҳатларга дучор бўлган. Уларнинг турли тана қисмларига қаттиқ ва ўткир буюмлар билан урилган.
Оқибатда ўша куни соат 15:00 атрофида Екатеринбург шаҳар ички ишлар бўлими биносида 1966 йилда туғилган озарбайжонлик Гусейн Сафаров, кичик бизнес эгаси, вафот этган. Унинг укаси, 1970 йилда туғилган Зияддин Сафаров эса эрталаб махсус бўлинманинг хизмат машинасида калтакланишдан вафот этган. У икки фарзанднинг отаси бўлиб, таксичилик қилган.
Суд-тиббий экспертизага кўра, Гусейн Сафаров қовурға синишлари ва бошқа оғир тан жароҳатлари оқибатида травматик ва қон йўқотиш шокидан вафот этган. Зияддин Сафаров эса кўп сонли тан жароҳатлари сабабли травматик шокдан ўлган.
Шунингдек, бошқа Озарбайжон фуқаролари ҳам шу тергов доирасида қийноққа солинган ва оғир ҳамда ўрта даражадаги тан жароҳатлари олган. Айни пайтда улар Россияда даволанмоқда. Озарбайжон бош прокурори тўпланган далиллар асосида қуйидаги моддалар бўйича жиноят иши қўзғатган:
- 12.2-модда — Озарбайжон фуқаросига нисбатан республикадан ташқарида содир этилган жиноят учун Озарбайжон қонунчилиги билан жавобгарликни белгилаш;
- 120.2.1 — гуруҳ бўлиб қасддан одам ўлдириш;
- 120.2.4 — ўта шафқатсизлик билан одам ўлдириш;
- 120.2.7 — икки ёки ундан ортиқ кишини ўлдириш;
- 120.2.9 — олдиндан тил бириктирган ҳолда одам ўлдириш;
- 309.2 — ваколатни суиистеъмол қилиш натижасида оғир оқибатларга сабаб бўлиш;
- 293.3 — қийноққа солиш ёки бошқа шафқатсиз, ғайриинсоний ёки қадр-қимматни камситувчи муомала ҳамда жазо турларини қўллаш, агар бу ҳаракатлар эҳтиётсизлик ортидан жабрланувчининг ўлимига сабаб бўлса.
Терговни Озарбайжон Бош прокуратураси ҳузуридаги махсус тергов бошқармаси олиб бормоқда. Иш юзасидан тергов гуруҳи тузилган ва фаол суриштирув ишлари олиб борилмоқда.
Изоҳ (0)