Қирол Чарльз Netflix стриминг платформаси билан шартнома тузди — у ўзининг The Kingʻs Trust хайрия ташкилоти ҳақида ҳужжатли фильм суратга олишни режалаштирмоқда. Бу ҳақда Deadline хабар бермоқда.
Суратга олиш ишлари келаси ҳафтадан бошланади ва премераси 2026 йилнинг кузига режалаштирилган. Фильмнинг режиссёри ва ижодий продюсери таниқли британиялик актёр Идрис Элба бўлиб, у ёшлигида The Kingʻs Trust томонидан грант олган, бу эса унга таълим олиш ва карьерасини бошлашга ёрдам берган.
“The Kingʻs Trust менга ҳаётимни ўзгартириб юборган имкониятни берди. Ўз амбицияларимни амалга ошириш учун маблағим бўлмаган бир пайтда, улар менга карьерамнинг дастлабки қадамларини қўйишимга молиявий ёрдамни таклиф қилишди. Бугун Elba Hope Foundation орқали мен катта салоҳиятга эга бўлмаган ёшлар учун ҳам худди шундай имкониятларни яратишга эътибор қаратмоқдаман. Дунё бўйлаб миллионлаб одамлар ҳали ҳам ўша ягона эшиклар очилишини кутмоқда. Ушбу ҳужжатли фильм нима учун The Kingʻs Trust иши муҳим бўлиб қолаётгани ҳақида маълумот беради”, деди Элба.
1976 йилда Чарльз (ўша пайтда Уэлс шаҳзодаси) томонидан ташкил этилган жамғарма бутун дунё бўйлаб миллиондан ортиқ ёшларни қўллаб-қувватлайди. Элба, шунингдек, ҳозирда Elba Hope Foundation орқали ёшлар ташаббусларини амалга оширишга ўзи ёрдам бераётганини таъкидлади.
Netflix аллақачон қироллик оиласи билан ҳамкорлик қилиш тажрибасига эга. 2022 йилда платформа шаҳзода Гарри ва Меган Марклнинг ҳаёти ҳақидаги ҳужжатли сериални чиқарди, шунингдек, бошқа бир қатор қўшма лойиҳаларни амалга оширди — хусусан, “Етакчи бўлиш учун яшаш” етакчилар билан интервьюлар ва шаҳзода Гарри ташаббуси билан бошланган фахрийлар мусобақалари ҳақидаги “Йўқолган юрак” сериали шу жумладандир. 2025 йил март ойида Netflix Меган Марклнинг “Севги билан, Меган” пазандачилик шоусини ҳам тақдим этди.
Изоҳ (0)