Кремль Швецияни обрўсизлантириш ва унинг НАТОга қўшилишига йўл қўймаслик учун мамлакатга қарши мақсадли ахборот кампаниясини бошлади, деб ёзмоқда The New York Times Швеция Мудофаа вазирлиги қошидаги Психологик мудофаа агентлигига таяниб.
Агентлик Россияни Стокгольмда Қуръон ёқиб юборилган акциялардан ўз манфаати учун фойдаланганликда очиқ айбламоқда. Агентлик ижрочи директори Микаэль Тофвессоннинг таъкидлашича, Россия бундай акциялар ҳақидаги хабарларнинг тарқатилишини “мисли кўрилмаган даражага” чиқарган.
Швециянинг НАТОга аъзо бўлиши Туркиянинг эътирозлари туфайли тўхтаб турибди.
NYT маълумотларига кўра, айрим тадқиқотчилар Россия бундай намойишларни уюштиришда бевосита иштирок этганига ишонади. Мисол сифатида Қуръонни ёқиш бўйича даниялик сиёсатчи Расмус Палудан томонидан уюштирилган илк акциялардан бири келтирилади. Намойиш ўтказиш учун рухсатнома 320 крон (тахминан 30 доллар) туради, пулни аввал Россия ОАВда ишлаган швед журналисти Чанг Фрик тўлаган, деб ёзади газета.
Яна бир намойишчи Салван Момика Қуръонни ёқиш бўйича бир қатор кичик намойишларга бошчилик қилди, бу Ироқда икки марта намойишларга сабаб бўлди, улардан бири Бағдоддаги Швеция элчихонасига ҳужум билан тугади. Газетанинг ёзишича, Момика журналистларга ўз ҳаракатининг сабаблари ҳақидаги саволларига электрон почта орқали жавоб беришга рози бўлган, бироқ Россия билан алоқалари ҳақида сўралганида жавоб қайтаришни тўхтатган.
Швеция Психологик мудофаа агентлиги раҳбари Магнус Хорт Россиянинг Швециядаги норозилик намойишларига эҳтимолий алоқаси ҳақидаги маълумотга изоҳ бермади.
“Агар демократик жамиятда яшасангиз, жамоатчиликни дезинформациядан ҳимоя қилишнинг энг яхши йўли — аҳолининг таҳдид ва заифликлардан хабардорлигини ошириш, шунда улар тўғри қарор қабул қила олади. Шведчасига шунақа”, — деди Микаэль Тофвессон
Изоҳ (0)