Швеция прокуратураси икки эркакни Россия Федерацияси фойдасига жосуслик қилганликда айблади. Бу ҳақда Швеция прокуратурасига таяниб, Bloomberg хабар берди.
Миллий хавфсизлик бўлими прокурорлари Пьер Линдквист ва Мац Жунгквист бугун икки кишини Россия фойдасига йирик жосусликда айблади. Улардан бири муҳим махфий маълумотларга рухсатсиз киришда ҳам айбланмоқда, дейилади прокуратура ҳисоботида.
Айбланувчилардан бири 2014 йилдан 2015 йилгача Швеция хавфсизлик хизматида, ундан олдин эса Швеция Қуролли кучларида ишлаган. Махфий маълумотларни тўплаш меҳнат муддати давомида содир бўлган деб тахмин қилинмоқда.
Бош прокурор Пьер Линдквист баёнотида бу ҳаракат жиддий жиноят ҳисобланиши, чунки бу маълумот орқали хорижий давлат Швецияга зарар этказиши мумкинлигини қўшимча қилди. Бу икки эркак 2021 йил сентябрь ва ноябрь ойларидан бери ҳибсда сақланмоқда, уларнинг фуқаролиги ҳисоботда кўрсатилмаган.
Маълумот ўрнида, 2021 йил Болгария ҳарбий прокуратураси олти нафар амалдаги ва истеъфодаги ҳарбий хизматчини Россия фойдасига жосуслик қилишда айблаганди. Ҳарбий судга йўлланган айбловда ишга алоқадор шахслар махфий маълумотларни йиғиш ва хориж давлатига топшириш билан шуғуллангани кўрсатиб ўтилган.
Изоҳ (0)