Бугун, 27 июнь куни “Калмар ўйини” сериалининг якунловчи учинчи мавсуми Netflix платформасида премера қилинди. Бу сериал замонамизнинг энг машҳур шоуларидан бири ҳисобланади. Финал муносабати билан биринчи ва иккинчи мавсум воқеаларини эслатиб ўтмоқчимиз.
Биринчи мавсумда нима бўлганди?
Қарзга ботиб кетган қиморбоз Сон Ки Хун метро бекатида башанг кийинган эркак билан болалар ўйини — ттакчи ўйнашга рози бўлади. Ютса, у 100 000 вон олади, ютқазса шапалоқ ейди. Бир неча муваффақиятсиз ўйинлардан сўнг, Ки Хунга рамзлар туширилган ташриф қоғози берилади ва катта ютуқ тикилган ўйин ўйнашга таклиф этилади. Қаҳрамон рози бўлади ва бошқа 455 иштирокчи билан бирга сирли жойга боради. У ерда уларга асосий қоида тушунтирилади: мусобақадан чиққан ҳар бир иштирокчи соврин жамғармасини 100 миллион вонга кўпайтиради. Бошқача айтганда, 45,6 миллиард вон тикилган, аммо бу пулни фақат ғолиб олади.
“Секин юрсанг, узоққа борасан” деган биринчи ўйинда майдон бўйлаб югуриш пайтида иштирокчилар мағлублар нафақат ўйиндан чиқиб кетишини, балки ҳалок бўлишини тушуниб етишади. Бироқ омон қолганлар ўйинни давом эттириш ёки тарк этишни танлаш ҳуқуқига эга. Тирик қолганларнинг аксарияти ўйинни тўхтатишга овоз беради. Иштирокчилар уйларига қайтишади, аммо тез орада яшаш учун на истаги, на маблағи борлигини англашади. Ки Хунга онасининг жарроҳлик амалиёти учун пул керак, қаҳрамоннинг мактабдош дўсти ва молиячи Чхо Сан У бир пайтлар ўғирлаган пулларни қайтариши лозим, қочқин Кан Се Бёк ота-онасини Шимолий Кореядан олиб чиқишни режалаштирмоқда, 001 рақамли ўлим тўшагидаги О Ил Нам эса шунчаки ўйинда жон беришдан чўчимайди.
Қаҳрамонлар қайтиб келишади, гуруҳ тузиб, бошқа иштирокчиларни алдашга киришади. Ташкилотчилар низолар ва қотилликларни рағбатлантиради. Иккинчи ўйин “Шакарли ширинлик” бўлиб, унда игна билан карамелдан мураккаб шаклларни синдирмасдан кесиб олиш керак. Учинчиси — “Арқон тортиш”, тўртинчиси эса — “Шарчалар” бўлиб, унда ҳар қандай усул билан рақибнинг шарчаларини олиш мақсад қилинади. Кимдир ўзини қурбон қилиб, шарчаларини ихтиёрий равишда рақибига беради, бошқалар куч ёки алдов ёрдамида ғалаба қозонади. Ки Хун хотираси пасайган кекса Ил Намни ўз ғалабасига ишонтиради — 001-рақамли ўйинчи ўйиндан чиқиб кетади.
Бешинчи ўйин — “Шиша кўприк”: иштирокчилар тобланган ва оддий шиша плитали кўприкдан ўтишлари керак. Мусобақада уч киши — Ки Хун, Чхо Сан У ва оғир жароҳат олган Кан Се Бёк тирик қолади. Чхо Сан У сўнгги топшириқни кутаётиб, қизни ўлдиради.
Ғолибни болаларнинг сўнгги ўйини — “Калмар ўйини” аниқлайди. Ҳал қилувчи лаҳзада Сон Ки Хун дўстини ўлдиришдан бош тортади ва совринни бўлишишни таклиф қилади, аммо Чо Сан У ўзини ўзи ўлдиради. Қаҳрамон уйига қайтгач, онасидан айрилганини билади. Бир йил ўтгач, Сон Ки Хун ўйиннинг ҳақиқий ташкилотчиси — тўшакка михланган кекса О Ил Нам билан учрашади. У ўлими олдидан ўзини ва ўзи каби зериккан бойларни овунтирмоқчи бўлганини, болалар ўйинлари мавзусини эса соғинч туфайли танлаганини тан олади. Якуний қисмда Ки Хун Ил Намнинг ўлимидан сўнг ҳам ўйинлар давом этаётганини билиб қолади ва бегуноҳ одамларнинг ўлимини бутунлай тўхтатиш учун яна ўйинга қайтишга қарор қилади.
Иштирокчилар ўйинда омон қолиш учун курашаётган пайтда, полициячи Хван Чун Хо йўқолган акасини излайди. Акасининг нарсалари орасидан рамзли ташриф қоғозини топади. У Ки Хунни ва кейинчалик қаҳрамонни ўйинга қайта олиб кетган одамларни кузатишни бошлайди. Чун Хо ташкилот аскари қиёфасида оролга яширинча кириб олади.
Чун Хо тергов бошлайди: далил тўплайди, ҳужжатларни суратга олади, ходимлар иерархиясини, ҳалок бўлган иштирокчиларнинг аъзоларини сотишни, гаров ўйнаётган VIP меҳмонларни ва ўйинларнинг кўп йиллик тарихини ўрганади. Маълум бўлишича, қаҳрамоннинг акаси Хван Ин Хо нафақат ўтган ўйинлардан бирининг ғолиби, балки қора ниқоб остида яширинган ҳозирги ўйинларнинг бошловчиси ҳам экан. Мавсум якунида Хван Ин Хо укасига келишув таклиф қилади, аммо полициячи рад этгач, унга ўқ узади. Ярадор қаҳрамон қоядан сувга қулаб тушади.
Иккинчи мавсум қандай давом этди?
Икки йилдан буён Сон Ки Хун ўйиннинг янги ташкилотчиларини тинмай излаб, ютган барча пулини шунга сарфлайди. Бир куни Ки Хуннинг икки ходими бир эркакни топиб, уни таъқиб қилишади ва тузоққа тушиб қолишади: ёлловчи уларни боғлаб, рус рулеткасини ўйнашга мажбур қилади. Худди шундай гаровни ёлловчи тез орада Ки Хунга ҳам таклиф этади — қаҳрамон ғалаба қозонади.
Биринчи мавсум финалидан сўнг тирик қолган полициячи Хван Чун Хо акасини излашни давом эттириб, Ки Хуннинг изига тушади. Қаҳрамонлар ташкилотчиларни тўхтатиш учун бирлашади ва ёлловчининг нарсалари орасидан Хеллоуин кечаси ўтказиладиган тунги клуб манзилини топадилар. Клубга бостириб кириш чоғида ташкилотчилар Ки Хунни ўғирлаб кетишади ва қидирувни тўхтатишни талаб қилишади — бунга жавобан қаҳрамон ўйинга қайтишни сўрайди.
Янги ўйинлар. Сон Ки Хун янги иштирокчилар орасида уйғониб, янгиликдан хабар топади: ҳар бир ўйиндан сўнг овоз берилади — агар кўпчилик ўйинни давом эттиришни рад этса, тўпланган соврин пули омон қолганлар ўртасида тақсимланади. Ки Хун иложи борича кўпроқ иштирокчини қутқариш учун “Секин юрсанг, узоққа борасан” ўйинининг қоидаларини барчага тушунтиради, аммо барибир қурбонлардан қочиб бўлмайди. Кейинги овоз беришда кўпчилик ўйинларни давом эттиришни танлайди — ҳал қилувчи овоз Хван Ин Хога тегади. У биринчи мавсумдаги Ил Нам сингари ўзини 001-рақамли иштирокчи сифатида кўрсатадиган бошловчидир.
001-рақамли ўйинчи ва бошқа иштирокчилар Ки Хуннинг тажрибаси ҳаммага кейинги синовлардан осон ўтишга ёрдам беради, деб ўйлайди. Янги ўйинчилар орасида шов-шувли рэпер Танос, Ки Хуннинг дўсти ва унга ўхшаш қиморбоз Пак Чонг Бе, омадсиз Пак Ён Сик онаси (Кан Э Сим) билан ҳамда трансгендер аёл Чо Хён Чжу бор. Ўйинчилар Ки Хунда бўлмаган мусобақалардан ўтишади: бешта болалар ўйинидан иборат тўсиқлар йўлакчасига эга “Бешкураш” ва “Учинчиси ортиқча”.
Полициячи Чун Хо судхўрлар гуруҳи билан биргаликда денгизда ўйин ўтказиладиган жойни изламоқда. Ташкилотчилар Ки Хуннинг тишига яширилган кузатиш қурилмасини олиб ташлашгани сабабли қаҳрамонлар аниқ жойлашувни аниқлай олмайди. Кўп ўтмай, жамоа аъзоларидан бири ташкилотчилар учун ишлайдиган ва керакли оролни топишга фаол равишда тўсқинлик қилаётган икки томонлама жосус экани аён бўлади.
“Учинчиси ортиқча” ўйини тугагач, навбатдаги овоз бериш ўтказилиши лозим эди. Иштирокчилар орасида муштлашув бўлиб, Танос ҳалок бўлади. Ўйинни давом эттириш тарафдорлари ўч олишга қарор қилишади ва тунда ўйинни тўхтатиш учун овоз берганларга ҳужум қилишади. Қирғин пайтида Ки Хун гуруҳи яшириниб, қўзғолон режасини пишитади. Иштирокчиларни ажратиш учун аскарлар етиб келганда, қаҳрамонлар қуролларни қўлга олиб, диспетчерлик хонасига етиб бориш ва ўйинни тўхтатиш мақсадида исён кўтарадилар. Хонага яқинлашганда, Хван Ин Хо иштирокчиларга хоинлик қилади, ўз ўлимини саҳналаштиради ва ташкилотчининг қора либосида Ки Хуннинг кўз олдида Пак Чон Бени ўлдиради.
Изоҳ (0)