Россия президенти Владимир Путин “Орешник” баллистик ракетаси билан Киевга зарба бериш учун нишонларни аниқлашни буюрди. Бу ҳақда манбаларга таяниб, Россия оммавий ахборот воситалари хабар берди.
“Маш” ва “База” нашрлари манбаларига кўра, Путин Мудофаа вазирлигига шундай кўрсатма берган. Россия президенти ўт очишни тўхтатиш бўйича уч кунлик сулҳ бўлмаслигини айтгани таъкидланмоқда.
Россия позициясининг ўзгариши ҳозирги провокациялар, жумладан, Украина дронларининг пойтахтга ҳужум қилишга уринишлари ҳамда Украинанинг Москвадаги байрам тадбирлари пайтида янада жиддийроқ провокацияларни тайёрлаётгани билан боғлиқ, дейди Россиянинг тарғибот манбалари.
Россия 21 ноябрь куни ўзининг “Орешник” баллистик ракетаси билан Днепрга зарба берганди, юқори тезлиги туфайли уни тутиб олиш деярли имконсиз. “Орешник”нинг биринчи парвозидан уч ой ўтгач, Россия 6 февраль куни баллистик ракета билан Киевни нишонга олишни режалаштирган. Ҳарбий мухбир Кирилл Сазонов таъкидлашича, “Орешник” нишонга етиб бормасдан, ишдан чиқиб, портлаган.
Россия президенти Владимир Путин “Орешник”нинг илк парвозларидан сўнг Киевдаги “қарор қабул қилиш марказлари”, жумладан, Зеленский офисини нишонга олиш билан таҳдид қилганди. Аммо иккинчи парвознинг муваффақиятсизлиги Россия учун оғир зарба бўлди.
Хабарларга кўра, “Орешник”нинг муваффақиятсизликка учраган иккинчи парвози нафақат киевликлар ва Украина раҳбарларини бошпаналардаги таҳликали кутишдан халос этди, балки Кремль учун ҳам тескари таъсир кўрсатди. Чунки ядро каллаклари билан жиҳозланган қитъалараро баллистик ракетага ўхшаш “Орешник” ракетаси ҳарбий таъсирдан кўра кўпроқ ваҳима уйғотганди.
Изоҳ (0)