Улар мукаммал кўринишади, аммо ҳаётда ҳаммаси бошқача. Баъзилари кенг кийим кийиб, ўзларини яширишга ҳаракат қилади. Бошқалари эса ижтимоий тармоқларга сурат қўйишдан олдин йиғлайди. Ушбу мақолада йиллар давомида ўз камчиликлари билан курашиб, ҳозирда ўзини қабул қилишни ўрганаётган машҳурларнинг самимий гаплари бор.
Билли Айлиш ўзини ёмон кўргани учун кенг кийим кийган
Билли Айлиш нафақат рангли сочлари, балки кенг кийимдаги услуби билан ҳам машҳур. Бу услуб — модага эргашиш эмас, балки ўзига нисбатан нафратнинг белгиси.
У болалигидан ташқи кўринишини ёмон кўрганини яширмайди: “Ўзимни боримча қабул қилмасдим, узоқ вақт овқат емаган пайтларим бўлган. Очликдан азоб чекардим, аммо чидардим. Мен ўшанда атиги 12 ёшда эдим ва бу қандайдир телбалик эди”, дейди у.
Машҳурлик вазиятни янада ёмонлаштирди: нафақат у ўзини ёмон кўрар, балки интернетдаги кўпчилик ҳам унинг ташқи кўринишини танқид қиларди.
У бунга қарши курашди ва ўзини қабул қилиш учун кўп ҳаракат қилди. Ҳатто Not My Responsibility номли қисқа метражли фильм ҳам суратга олди. Унда у томошабинларга аста-секин кенг кийимлардан воз кечаётганини айтади.
Билли ҳозир ўзини олдингидан кўпроқ яхши кўришини айтади, лекин ҳали ҳам ўзига ишончсизлик билан курашади ва кўпинча ойнага қарашдан қочади.
Эмма Уотсон — йиллар давомида ўзини чиройли деб ҳисобламаган
Актриса ва модел Эмма Уотсоннинг юзи машҳур журналлар муқовасида кўп бор чиққан. Аммо у ҳам ташқи кўринишидан уялган.
10 ёшга тўлганимдан кейин ўзимда камчилик излайверардим, деган Эмма.
“Гарри Поттер”даги роли уни машҳур қилди, лекин бу унга қулайлик эмас, аксинча, босим олиб келди.
У ўзини муносиб эмасман деб, йиллар давомида журналларга суратга тушишдан бош тортди. Ҳатто дўстлари ёки мухлислари билан суратга тушиш ҳам унга қийин эди. Бугун эса Эмма бу ҳолатни енгди ва ўзини қабул қила бошлади. Аммо бу ундан анча вақт талаб қилди.
Селена Гомез — суратларини кўз ёш билан жойлаштирган
Селена соғлиғи билан курашган. У аутоиммун касаллиги билан яшайди. Бу касаллик туфайли буйрагини алмаштиришга мажбур бўлган ва узоқ вақт даволанган. Дориларнинг ножўя таъсирида юзага келган ортиқча вазн ва шишлар унга руҳий зарар етказган.
Селена бундай ташқи кўринишга кўниколмаган ва омма олдида чиқишдан бош тортган. Шунга қарамай, Apple TV+’нинг “Dear” номли ҳужжатли лойиҳасида иштирок этди. Бу лойиҳа орқали у бошқа одамларга ёрдам беришни истади.
Бугунги кунда у анча яхши ҳолатда. Аммо у бутун умр дори ичишга мажбур. Бу эса доимий равишда ўзини қабул қилиш устида ишлашни талаб қилади.
Белла Ҳадид ойнадаги аксини танимайди
Белла Ҳадид супермодел бўлишига қарамай, ўзига нисбатан ишончсизликни яширмайди. У танасини қабул қила олмаслигини кўп бор тан олган.
Бунинг сабабларидан бири синглиси билан доим рақобатлашиши ва Лайм касаллигидир. Бу касаллик тери ҳолатига таъсир қилади. Комплекслар аста-секин Белла Ҳадидни депрессияга ва спиртли ичимликларга қарам қилиб қўйди, бу ҳам унинг ўзига бўлган ишончига салбий таъсир кўрсатди.
Кўринишимдан кўнглим тўлмайди. Касалликни ҳис қилиб, ўз касбим билан шуғулланиш менга оғир бўлади, деган Ҳадид.
Ҳозирда у ичкиликни ташлаган ва ўзига кўпроқ эътибор қаратмоқда. Бироқ барибир ойнадаги аксини қабул қила олмайди.
Бу бошқа бир қиз. Ўзимга ва танамга ачинаман, дейди Ҳадид.
Машҳурлик, ташқи кўриниш ёки муваффақиятдан қатъи назар ўзига паст баҳо бериш ҳар қандай инсонни безовта қилиши мумкин.
Изоҳ (0)