Осиёнинг энг бой одами Мукеш Амбанининг коласи дунёнинг энг гавжум мамлакатларидан бири— Ҳиндистонда Coca-Cola ва Pepsi компанияларининг кўп йиллик ҳукмронлигига путур етказмоқда.
68 ёшли миллиардернинг Campа Cоlа ичимликларини ишлаб чиқарувчи компанияси маҳсулотни сотувга чиқарганидан атиги икки йил ўтиб, бозордаги улушини кескин оширди. Газланган ичимликнинг муваффақиятини мутахассислар унинг арзон нархига боғлайди: атиги 200 миллилитрлик шиша учун 10 рупий (0,12 доллар ёки 1500 сўм), бу Coca-Cola ва Pepsi компанияларининг шунга ўхшаш ҳажмли шишасидан тахминан икки баравар арзон.
Campа Cоlа томонидан рақобат таҳдиди брендларни Ҳиндистонда янги тамларни чиқаришга ва нархларни пасайтиришга мажбур қилди. Масалан, Coca-Cola ўзининг шу номдаги ичимликларини мамлакатнинг баъзи ҳудудларида 15 рупийга (0,18 долларга) туширди.
Мукеш Амбани — нефть ва газни қайта ишлаш, чакана савдо ва оммавий ахборот воситалари билан шуғулланувчи Reliance Industries компаниясининг асосий эгаси бўлган ҳинд бизнесмени ҳисобланади. Сўнгги маълумотларга кўра, Амбанининг бойлиги 115 миллиард долларга баҳоланмоқда, бу уни Осиёнинг энг бой одамига айлантиради. У дунёдаги энг катта хусусий турар жой деб аталадиган ўзининг осмонўпар биносига яшайди.
2024 йилда жаҳон оммавий ахборот воситалари Амбанининг ўғли Анантнинг “аср тўйи” ҳақида гапиришди, унга Кардашьянлар оиласи, Буюк Британиянинг собиқ бош вазири Тони Блейр ва унинг рафиқаси, Девид Бекхем ва бошқа машҳурлар, жумладан, Болливуднинг энг машҳур юлдузлари ташриф буюришди. Баъзи маълумотларга кўра, тўй 600 миллион долларга тушган. Умуман олганда, ушбу круиз ва зиёфатларни ўз ичига олган дабдабали тўй олти ой давом этган: бунинг учун ҳатто Италиянинг Портофино ва Генуя шаҳарлари “ёпилган”.
Изоҳ (0)