Исроилнинг Эрон баллистик ракеталари зарбаларидан ҳимояланиш учун фойдаланаётган Arrow мудофаа ракеталари тугамоқда. Бу ҳақда америкалик амалдор The Wall Street Journal нашрига хабар берди.
Амалдорга кўра, бу Исроилнинг Эронга қарши узоқ муддатли уруш олиб бориш қобилиятини шубҳа остига қўяди. Машҳур “Темир гумбаз” ҳаво ҳужумидан мудофаа тизими ҳозирги можарода кам қўлланилмоқда, чунки у қисқа масофали ракеталарни қайтаришга мўлжалланган.
Исроилнинг асосий қалқони 2400 километргача бўлган Arrow 3 ракеталари бўлиб, улар яҳудий давлатига учаётган ракеталарни унинг чегараларидан узоқда уриб туширишга қодир. Шунингдек, яқинроқ таҳдидларни бартараф этиш учун 70 километргача масофани қамраб олувчи Arrow 2 тизими ҳам қўлланилади.
WSJ манбаси таъкидлашича, АҚШ бир неча ойдан бери Исроилнинг мудофаа салоҳияти етарли эмаслигини англаб етган. Шу сабабли июнь ойида турли турдаги ракетага қарши тизимларни етказиб беришни кўпайтирган, аммо уларнинг захиралари ҳам чексиз эмас. Ўтган йиллар давомида Пентагон ишлаб чиқарувчилардан атиги 605 та мудофаа ракеталарини сотиб олган.
Исроил расмийларига кўра, улар душман баллистик ракеталарининг қарийб 90 фоизини уриб туширади. Эрон томонидан учирилган 370 та ракетадан атиги 30 га яқини (17 июнь ҳолатига кўра) нишонга етиб боргани айтилмоқда.
Аммо Стратегик ва халқаро тадқиқотлар марказининг (CSIS) ракетага қарши мудофаа лойиҳаси директори Том Караконинг сўзларига кўра, самарадорлик эмас, балки салоҳият муҳимроқдир.
АҚШ ҳам, Исроил ҳам кун бўйи учирилган ракеталарни тўхтовсиз бартараф этишда давом эта олмайди. Исроилликлар ва уларнинг иттифоқчилари имкон қадар тезроқ зарур чораларни кўриши лозим. Улар шунчаки ўтириб, мудофаа ўйинини ўйнашга йўл қўймаслиги керак, дейди Том Карако.
Arrow тизимларини ишлаб чиқарувчи Israel Aerospace Industries компанияси юқоридаги хабарга изоҳ бермаган. Исроил мудофаа кучлари баёнотида шундай дейилган: “СAҲAЛ тайёр ва ҳар қандай сценарийни енгишга тайёр. Афсуски, биз ўқ-дорилар билан боғлиқ масалаларга изоҳ бера олмаймиз”.
Изоҳ (0)