Сурхондарё вилояти Сариосиё тумани тоғ ва адирликларига сел келди. Бу ҳақда “Ўзгидромет” хабар берди.
Маълум қилинишича, 11 июнь соат 12:50 ларда Сурхондарё вилояти Сариосиё тумани тоғ ва адирликларида кузатилган жала ёмғир натижасида сел келган. Келган сел “Хонжиза” МФЙ Хожиасмин қишлоғига олиб чиқувчи ички йўлнинг маълум қисмига тош ва шағал уюмларини чиқариб ташлагани аниқланган.
Сариосиёда ёғингарчилик миқдори 5.00 мм бўлган. Ҳозирча ҳеч қандай талафот кузатилмаган.
Ўзбекистон ҳудудига 6—7 июнь кунлари нисбатан салқин ва нам ҳаво массалари кириб келиши бошланганди. Прогнозларга кўра, иш ҳафтаси давомида ҳам Ўзбекистон ҳудуди бўйича нисбатан нам ҳаво массаси циркуляцияси давом этади. 16 июнгача тоғолди ва тоғли ҳудудларда сел хавфи эълон қилинган.
Жиззах вилоятининг Зомин тумани, “Дуоба” МФЙ, “Еттикечув” ҚФЙнинг юқорисида жойлашган тоғ ва адирликларида кузатилган жала натижасида 10 июнь соат 17:20 да сел оқимлари оқиб ўтгани хабар қилинганди.
Ҳеч қандай талафот кузатилмаган.
Шунингдек, соат 17:10 да “Тараққиёт” МФЙ, “Ҳулкар” ҚФЙга ҳам сел келган. Сел автомобиль йўлига тош ва шағалларни чиқариб ташлаган.
Шу билан бирга, соат 17:30 ларда “Туркман” МФЙдан ўтувчи Туркмансойнинг юқорисида жойлашган тоғ ва адирликларда кузатилган жала ёмғир натижасида сел оқимлари оқиб оътган.
Ушбу ҳодиса оқибатида талафотлар ёъқ.
Май ойи охирида ҳам Зомин туманининг айрим ҳудудларига сел келган эди.
Изоҳ (0)