Қамчиқ довонида икки аёл сел оқизиб кетишидан ҳалок бўлди

Қамчиқ довонида наманганлик икки нафар аёл жасади топилгани ҳақида хабарлар тарқалди. Наманган вилояти ФВБ матбуот хизмати бунга муносабат билдирди.

Маълум бўлишича, 7 июль куни М-39 Гулистон—Бўка—Ангрен—Қўқон ва Андижон орқали — Ўш автомобиль йўлининг Тошкент—водий йўналишида икки нафар 27 ёшли аёл тоғ баландлигидаги йирик шохли молларини соғиш учун кетаётган бўлган.

Соат 19:20 дан 19:27 гача кучли жала ёғиши кузатилган. Аёллар ёмғирдан қочиб, сел тошқин сувлари учун махсус 1200 диаметрли темир қувур ичида ўтирган вақтда 40-50 метр куб сел келиб, қувур ичидан “Резаксой”нинг 400 метр оқими бўйлаб олиб кетган.

Сойни сел массасидан тозалаш жараёнида аёлларнинг жасади топилган.

Ҳозирда ИИБ тезкор-тергов гуруҳи томонидан дастлабки терговолди суриштирув ишлари олиб борилмоқда.

“Ўзгидромет” 5–7 июль кунлари ёмғир ёғиши кутилаётгани сабабли республиканинг тоғолди ва тоғли ҳудудларида сел-сув тошқин ҳодисалари юзага келиши мумкинлигидан огоҳлантириб, тоғолди ва тоғли ҳудудларда истиқомат қилувчи фуқаролардан эҳтиёт чораларини кўришларини сўраганди.