Surxondaryo viloyati Sariosiyo tumani tog‘ va adirliklariga sel keldi. Bu haqda “O‘zgidromet” xabar berdi.
Ma’lum qilinishicha, 11-iyun soat 12:50 larda Surxondaryo viloyati Sariosiyo tumani tog‘ va adirliklarida kuzatilgan jala yomg‘ir natijasida sel kelgan. Kelgan sel “Xonjiza” MFY Xojiasmin qishlog‘iga olib chiquvchi ichki yo‘lning ma’lum qismiga tosh va shag‘al uyumlarini chiqarib tashlagani aniqlangan.
Sariosiyoda yog‘ingarchilik miqdori 5.00 mm bo‘lgan. Hozircha hech qanday talafot kuzatilmagan.
O‘zbekiston hududiga 6—7-iyun kunlari nisbatan salqin va nam havo massalari kirib kelishi boshlangandi. Prognozlarga ko‘ra, ish haftasi davomida ham O‘zbekiston hududi bo‘yicha nisbatan nam havo massasi sirkulyatsiyasi davom etadi. 16-iyungacha tog‘oldi va tog‘li hududlarda sel xavfi e’lon qilingan.
Jizzax viloyatining Zomin tumani, “Duoba” MFY, “Yettikechuv” QFYning yuqorisida joylashgan tog‘ va adirliklarida kuzatilgan jala natijasida 10-iyun soat 17:20 da sel oqimlari oqib o‘tgani xabar qilingandi.
Hech qanday talafot kuzatilmagan.
Shuningdek, soat 17:10 da “Taraqqiyot” MFY, “Hulkar” QFYga ham sel kelgan. Sel avtomobil yo‘liga tosh va shag‘allarni chiqarib tashlagan.
Shu bilan birga, soat 17:30 larda “Turkman” MFYdan o‘tuvchi Turkmansoyning yuqorisida joylashgan tog‘ va adirliklarda kuzatilgan jala yomg‘ir natijasida sel oqimlari oqib oʼtgan.
Ushbu hodisa oqibatida talafotlar yoʼq.
May oyi oxirida ham Zomin tumanining ayrim hududlariga sel kelgan edi.
Izoh (0)