Олимлар 86 миллион йил аввал яшаган Khankhuuluu mongoliensis номли тираннозаврнинг илгари номаълум турини аниқлади. АBC телеканали эълон қилинган тадқиқот ва олимлар билан суҳбатга асосланиб хабар беришича, бу янги тур Т-Rех каби улкан тираннозаврларнинг бевосита аждоди бўлиши мумкинлиги билан алоҳида қизиқиш уйғотмоқда.
Телеканал маълумотига кўра, қолдиқлар дастлаб 1970 йилларда Мўғулистоннинг Гоби чўлидан топилган ва гўштхўр алектозаврга тегишли деб ҳисобланган. Ўшандан бери бу қазилмалар чуқур ўрганилмаган эди. Бироқ 2023 йилда Канаданинг Калгари университети аспиранти экспедиция пайтида бу топилмаларга эътибор қаратган ва баъзи ғайриоддий хусусиятларни, жумладан, одатда бундай турларда учрамайдиган бурун атрофидаги ҳаво бўшлиғини пайқаб, қайта ўрганишни бошлаган.
“Қайта текширувдан сўнг тадқиқотчилар қазилмалар тираннозавридларнинг янги турига тегишли экан, деган хулосага келишди”, дейилади телеканал хабарида.
86 миллион йил аввал яшаган бу янги тур Khankhuuluu mongoliensis деб номланди.
Science Alert сайтининг таъкидлашича, у “нисбатан кичик” тираннозавр бўлиб, ўлчамлари “катта от” билан таққосланади: бўйи тахминан икки метр, вазни эса 750 килограмм атрофида. Унинг узун оёқлари тез югуриш имконини берган, аммо бош суягининг тузилиши хавфли йиртқич бўлишига йўл қўймаган. Тахминларга кўра, у 20 миллион йил кейинроқ яшаган Т-Rех каби йирикроқ тираннозаврларнинг бевосита аждоди бўлган.
Бу кашфиёт тираннозаврлар эволюциясининг илгари номаълум бўлган даврини ёритиб берди.
Янги Зеландия олимлари 2200 йилга келиб ер юзидаги судралиб юрувчилар гигант ҳажмга етишини аниқлашди. Тахмин қилинишича, айрим турдаги рептилияларнинг вазни 100 килограммдан ошиши мумкин. Ҳаттоки энг майда судралувчилар, масалан, игуаналар ҳам йирик итлар ҳажмига етиши мумкин.
Изоҳ (0)