Миллиардер ва Citadel хеж-фонди асосчиси Кен Гриффин Нью Йоркдаги Sotheby’s кимошди савдосида деярли тўлиқ стегозавр скелетини рекорд даражадаги 44,6 миллион долларга сотиб олди. Бу ҳақда The Wall Street Journal хабар берди.
Нашрнинг ёзишича, Апекс лақабли динозавр скелети тахминан 150 миллион ёшда. У 2022 йилда Колорадода палеонтолог Жейсон Купер томонидан топилган.
Бу топилган энг тўлиқ стегозавр скелети бўлиб, унда тахминан 319 та асл суякдан 254 таси бор, дея қайд этади The Guardian.
Бундан ташқари, Апекс энг яхши сақланган стегозавр скелети ҳисобланади.
Sotheby’s аукцион уйи скелет олти миллион долларгача сотилишини кутганди. Динозавр қолдиқлари нархи бўйича аввалги рекорд 2020 йилда ўрнатилган. Ўшанда ёши тахминан 67 миллион йил бўлган тиранозавр скелети Нью Йоркдаги Christie’s аукционида деярли 32 миллион долларга сотилган.
Гриффин ўз харидини шарҳлар экан, скелетни Америка музейига совға қилишни режалаштираётганини айтган.
Апекс Америкада туғилган ва шу ерда қолади, дейди миллиардер.
Кен Гриффин тарихий мулк учун аукционларда биринчи марта ғалаба қозониши эмас. 2021 йилда у АҚШ конституцияси илк нашрининг нодир нусхасини 43,2 миллион долларга сотиб олган. У нусха Қўшма Штатларда қолишига ишонч ҳосил қилиш учун криптоинвесторлар гуруҳини ортда қолдирган. Кейинчалик миллиардер конституцияни Бентонвилдаги Cristal Bridges Америка санъати музейига топширган.
Изоҳ (0)