“Operation Barbie Summer” — Warner Bros. Discovery бош директри Дэвид Заслав йил бошида ўз жамоаси учун режиссёр Грета Гервиг суратга олган фильмни тарғиб қилиш кампаниясини белгилаб берди. 2023 йилнинг ёзи ҳақиқатан ҳам шундай бўлди. Сюжетга кўра ўйинчоқлар дунёсидан ҳақиқий дунёга айланган идеал пластик қўғирчоқ ҳақиқатан ҳам кинотеатрларни, ижтимоий тармоқларни, реклама тахталарини, дўкон ойналарини ва Голливуд саноатини забт этди.
Грета ва унинг кичкина аёллари
Марго Робби Warner Bros билан бирга малласоч қўғирчоқ ҳақидаги ҳикояни фильмга мослаштириш ҳуқуқини сотиб олади. Шунингдек, у Гервигни фильмга сценарий муаллифи сифатида таклиф қилади. Продюсерлар унинг маслаҳатига қулоқ солишади. Гервиг фильм сценарийсини шериги — режиссёр ва сценарий муаллифи Ноа Баумбах билан бирга ёзади. Кейин эса сценарийни бошқа режиссёрга бера олмаслигини тушунади ва фильмга ўзи режиссёрлик қилади.
Ҳозирда Грета Гервиг кино тарихида миллиард долларлик рекорд ўрнатган биринчи аёл режиссёрга айланди. Бир неча йил олдин уни катта бюджетли лойиҳанинг юлдузи сифатида тасаввур қилиш қийин эди. 2010 йилларда актриса, сценарийнавис ва режиссёр ўзини мустақил фильмлар муаллифи сифатида кўрсатди. Гретанинг экрандаги қаҳрамонлари кўпинча турли даражадаги муваффақиятларга эришиб, ўсиб-улғайишга ҳаракат қиладиган, аммо ўзига ишонмайдиган қизлар эди. Гервигнинг режиссёр сифатидаги дебюти, ўспирин қиз ҳақидаги “Леди Бёрд” (2017) фильми унга “Оскар”нинг энг шарафли номинацияси — “Энг яхши режиссёр” ва “Энг яхши оригинал сценарий”ни келтирди.
Гервигнинг иккинчи фильми — “Кичик аёллар” (2019) режиссёрнинг ўзига хос услуби бошқа бировнинг материали фонида йўқолмаслигини, қайтага янада ёрқинроқ бўлишини кўрсатди.
Variety нашрига кўра, фильмга ажратилган 145 миллион долларлик бюджетдан ташқари маркетинг кампанияси 150 миллион доллар сарфлаган. Пиар-кампания доирасида Малибуда Барбининг уйи дизайнига тақлид қилувчи уч қаватли пушти сарой қурилган. Бу уйни ижарага олиш ҳуқуқини AirBnb хизмати олди. Барби қўғирчоғининг ўзи эса дунёдаги асосий сайёҳлик жойларига, масалан, Бурж Халифа, Хитойга бориб келишга муваффақ бўлди.
Google саҳифаси “Barbie”ни қидирганда пушти рангга айланди. Кийим-кечак брендлари Zara ва Balmain фильм чиқиши билан Барбининг севимли рангларида чекланган коллекциясини чиқарди (масалан, Балмейннинг Барби ёзуви туширилган пушти қалпоқчаси 1 350 долларга сотилди). Nyx косметик бренди тенлар, кўзойнаклар, лаб бўёғи ва бошқа косметика воситаларининг чекланган палитрасини чиқарди. Кўринишидан, Warner Bros сотувчилари истеъмолчиларга таъсир қилиш учун барча мумкин бўлган воситалардан фойдаланган.
Аммо Barbie реклама кампаниясининг асосий нуқтаси томошабинларни максимал даражада жалб қилиш эди. Бутун дунёдаги кинотеатрларга пушти қўғирчоқ қутилари ўрнатилиб, ҳар ким ўзини Барби каби ҳис қилиши мумкин эди. Шундай қилиб, кинога бориш байрамга айланди, унда бош қаҳрамон бренд ёки ҳатто фильм эмас, балки томошабиннинг ўзи бўлди.
“Барби”нинг касса муваффақияти ҳақидаги турли мақолаларда “пластик дунё ғалаба қозонди” ибораси тез-тез қулоққа чалинади. Аммо Грета Гервиг фильмининг парадокси шундаки, унинг қаҳрамони, аксинча нафис Барбиленддан кўра ўзининг барча хусусиятлари билан реал воқеликни афзал кўради: 91 ёшли аёлнинг гўзаллиги, баланд пошнали туфлилар ўрнига қалин тагликли шиппак, беғам яшаш ўрнига ўлим ҳақида ўйлар. Фильм замонавий аёл томошабинларнинг аксарияти ўзи билан бирга катта бўлган ўйинчоққа бағишланган. “Трансформерлар” ва “Ниндзя тошбақалари” каби болаларнинг севимли машғулотларига бағишланган кўплаб фильмлардан сўнг биринчи марта қизларнинг қўғирчоқлар билан ўйнаш каби муҳим хобби катта экранларда намойиш этилмоқда.
Шу билан бирга, режиссёр эркакларни ҳам унутмайди. Райан Гослинг томонидан ижро этилган Барбининг дўсти Кен ҳақиқий дунёга келганида патриархатнинг ғалабасини кўради ва ниҳоят ўзини Barbieland’да бўлгани каби четда эмас, балки бош қаҳрамон каби ҳис қилади. Ўйинчоқлар дунёсига қайтиб, у бошқа Кенларга аёлларнинг эркакларга итоат қилиши қанчалик ажойиб эканлиги ҳақида гапириб беради. Аммо Барби ҳақиқий дунёдан ўйинчоқ дунёсига қайтганидан ва бир қатор гендер можароларидан сўнг, қаҳрамонлар Barbieland’да ҳаммаси ажойиб эмаслигини ва Кенлар ҳам ҳурматга муҳтожлигини тушунади. Натижада Кен ўзи учун қадрли эканлигини англайди — “I Am Kenough” (Ken ва enaugh, “етарли” сўзлари) ибораси аллақачон интернетга тарқалди ва Mattel 60 долларлик шундай ёзувли рангли қалпоқчалар сотувини эълон қилди.
Фильмнинг муваффақиятидан илҳомланган Mattel ҳатто ўзининг бошқа активлари: Барни динозавр, Hot Wheels автомобиллари, Polly Pocket қўғирчоқлари ва бошқа ўйинчоқ дўконлари хитлари бўйича лойиҳалар бошланганини эълон қилди. “Барби” фильмининг давомини суратга олиш ҳақида ҳам гап бор, бироқ Грета Гервиг ҳозирча буни режалаштирмаяпти: яқин йилларда у Netflix учун “Нарния йилномалари”нинг янги версиясини суратга олади.
Изоҳ (0)