Май ойи охирида биринчи “Мадагаскар” мультфильми 20 ёшга тўлди. Оилавий томоша учун яратилган бу анимацион фильм тезда шуҳрат қозонди, мультфильм ҳам катталар учун бирдек қизиқарли бўлиши мумкинлигини исботлади. Бундан ташқари, у юз миллионлаб доллар даромад келтирди, улкан медиа франшизасига айланди.
Биринчи “Мадагаскар” мультфильми фақат болаларбоп томоша бўлмай қолган пайтда экранларга чиқди. Бозор етакчилари DreamWorks (“Шрек” ва “Мадагаскар”) ва Pixar (“Махлуқлар корпорацияси”) ўша пайтга келиб муваффақиятнинг таъсирчан усулини ўзлаштириб олишган эди: ёрқин тасвирни болалар тушунадиган ажойиб юмор ва катталарга таъсир қиладиган драматургия билан уйғунлаштириш орқали турли ёшдаги томошабинлар эътиборини тортди.
Бундан ташқари, анимация қўшиқлар, фильмлар ёки машҳурлар жанжалларига ишораларни тобора кўпроқ ўз ичига ола бошлади. Мультфильмлардан олинган иқтибослар халқ орасида тарқалди, қўшиқлар оммалашди (Саша Барон Коэн ижросидаги Reel 2 Real гуруҳининг “I like to move it!” қувноқ қайта ишланган варианти ҳар бир мобил телефон ёки радиодан янграётган ҳитга айланди), қаҳрамонлар эса ўйинчоқлар, канселярия буюмлари, эсдалик совғалар ва бошқаларда янги кўриниш олди. Яъни анимация ёпиқ тизим бўлишдан тўхтади ва кинотеатрлар чегарасидан ташқарига чиқиб, ўз таъсир доирасини максимал даражада кенгайтирди.
Бюджети 75 миллион доллар бўлган биринчи мультфильм дунё бўйлаб 557 миллион доллар даромад келтирди. Гарчи Rotten Tomatoes сайтида танқидчиларнинг баҳоси 55% дан ошмаган бўлса-да, матбуот бир овоздан тан олди: мультфильм томошабинларга мурожаат қиладиган тилнинг универсаллиги туфайли муваффақият қозонди, катта-ю кичикни ўзига жалб қилди. Шунингдек, визуал жиҳатлари — сифатли анимация, ёрқин тасвирлар ва янги минг йилликнинг бошида кескин ривожланган компьютер графикасининг янги имкониятлари алоҳида эътироф этилди.
“Жилмаямиз ва қўл силкиймиз, йигитлар, жилмаямиз ва қўл силкиймиз!”
Биринчи қисмнинг муваффақияти (лойиҳа 2005 йилнинг энг кўп даромад келтирган ўнта фильми қаторига кирган) уни давом эттиришга туртки бўлди. 2005 йилда пингвинлар ҳаётидаги воқеаларга бағишланган 12 дақиқалик қисқа метражли “Мадагаскар пингвинлари Рождество саргузаштларида” фильми чиқди. Унда пингвинлар Янги йил авжида ёлғизликдан зериккан оқ айиқни қутқаришга бел боғлашади. 2008 йилда франшизанинг кейинги тўлиқ метражли қисми — “Мадагаскар 2” экранларга чиқди. Унда таниш қаҳрамонлар бу сафар Африкага тушиб қолишади. Айни пайтда телевидениеда етти йил давомида эфирга узатилиб, кино оламини янада кенгайтирган тўлақонли “Мадагаскар пингвинлари” мультсериали ҳам старт олди.
2012 йилда “Мадагаскар 3” чиққач, 2018 йилда “Мадагаскар 4” фильми устида ишланаётгани ҳақида гаплар тарқалди, аммо лойиҳа ваъдалардан нарига ўтмади.
“Баъзи ғоялар ишланмоқда, аммо аниқ ҳеч нарса йўқ. Айтишга арзигулик гап пайдо бўлиши билан дарҳол эълон қиламиз”, деб саккиз йил олдин режиссёр Том Макграт ваъда берган эди.
Умуман олганда, тўлиқ метражли франшиза жаҳон прокатида деярли 2,5 миллиард доллар даромад келтирди. Компьютер, ўйин приставкалари ва мобил телефонлар учун ўнта турли хил видеоўйин ишлаб чиқилди. 2011 йилдан 2018 йилгача “Мадагаскар”нинг бешта жонли томошаси намойиш этилди: мусиқий спектакллардан тортиб мураккаб цирк шоу-дастурларигача. Мультфильмлар асосида яратилган мавзули аттракционлар бутун дунё бўйлаб турли кўнгилочар боғларда, Шимолий Америкадан то Сингапургача, ўз ўрнини топди.
Изоҳ (0)