“Реал Мадрид” ҳимоячиси Рауль Асенсио вояга етмаган шахс иштирокидаги видеони тарқатишда гумон қилинмоқда. Испаниянинг Гран-Канария оролидаги Сан-Бартоломе де Тиражана суди тергов бошлангани ва тўрт футболчи, жумладан, Асенсио устидан жиноий иш қўзғатилиши мумкинлигини маълум қилган. Бу ҳақда The New York Times нашри хабар берди.
Видеодаги ҳаракатлар 2023 йил Гран-Канария ороли жанубида жойлашган клубда содир бўлган. Унга кўра, футболчилар вояга етмаган қиз иштирокидаги видеони рухсатсиз ёзиб олиб, WhatsApp орқали тарқатганликда айбланмоқда. Дастлаб бу ишда гувоҳ сифатида сўроқ қилинган Асенсио кейинчалик гумонланувчига айланган.
Терговда тилга олинган бошқа уч футболчи — Ферран Руис, Хуан Родригес ва Андрес Гарсия 2023 йил сентябрь ойида қўлга олинган. Уларнинг барчаси аввал “Реал Мадрид” ёшлар жамоасида Асенсио билан бирга ўйнаган бўлиб, Руис ҳозир “Жирона” сафида, Родригес ва Гарсия эса Испания 3-дивизионидаги “Тарасона” ва “Алкоркон” клубларида тўп сурмоқда.
Суд ҳужжатларига кўра, жабрланувчилардан бири ҳодиса содир бўлган пайт 16 ёшга тўлмаган бўлган. Иш энди прокуратурага топширилди. Прокурорлар уни судга ошириш ёки ёпиш бўйича қарор қабул қилади.
Ҳозирча на “Реал Мадрид” клуби, на Асенсионинг вакиллари бу борада изоҳ берган.
Клуб илгарироқ эълон қилган баёнотда: “Мазкур ҳолат бўйича барча фактлар аниқлангач, зарур чора-тадбирлар кўрилади”, дейилган эди.
Изоҳ (0)