Ўзбекистоннинг ташқи савдо айланмаси 2023 йилнинг январь ноябрь ойларида 57,3 миллиард долларни ташкил этиб, ўтган йилнинг шу даврига нисбатан 11,88 миллиард долларга ёки 26,2 фоизга ўсди. Бу ҳақда Статистика агентлиги ҳисоботида сўз боради.
Экспорт
Қайд этилишича, ноябрь ойида экспорт миқдори 2,73 миллиард долларни ташкил этган, бироқ бунинг деярли ярми олтин ҳиссасига тўғри келган. 1,28 миллиард долларлик қимматбаҳо металл сотилган (бу Марказий банкнинг олтин-валюта захираларининг камайишига олиб келди). Олтин экспорти йил бошидан буён рекорд даражадаги 8,15 миллиард долларга етган, бу ўтган йилнинг шу даврига нисбатан 2,3 баравар кўп.
11 ой ичида олтин етказиб бериш мамлакат экспортнинг учдан бир қисмидан кўпроғини (35,1 фоиз) ташкил этган.
Экспортда саноат маҳсулотларининг улуши кескин пасайиб, 22,3 фоиздан 16,2 фоизга тушган, етказиб бериш ҳажми ҳам 3,96 миллиард доллардан 3,75 миллиард долларгача камайган. Машина ва транспорт ускуналари сотуви эса 875 миллион доллардан 1,2 миллиард долларга ошиши ҳисобига уларнинг экспортдаги улуши ҳам 4,9 фоиздан 5,2 фоизгача ошган.
Импорт
Импорт борасида озиқ-овқат хариди юқори даражада қолмоқда: дон ва ундан тайёрланган маҳсулотлар 1,03 миллиард доллар (+7,8 фоиз), шакар, шакар ва асал маҳсулотлари 511,1 миллион доллар (-3,5 фоиз), қаҳва, чой, какао, зираворлар 344 миллион доллар (+24 фоиз), ўсимлик мойлари ва ёғлар 321,6 миллион доллар (+29,4 фоиз), гўшт ва гўшт маҳсулотлари 308 миллион доллар (+8,5 фоиз), сабзавот ва мевалар 301,9 миллион доллар (+22,6 фоиз), сут маҳсулотлари ва тухум 192,7 миллион доллар (+34,5 фоиз).
Нефть ва нефть маҳсулотлари (1,38 млрд доллар, +26,9 фоиз), кўмир, кокс ва брикетлар (189,2 миллион доллар, +78,8 фоиз) ҳам импорти ошди. Газ етказиб бериш 2,1 бараварга — 562,7 миллион долларгача кўпайди. Агар сентябрь ойида 286 млн долларлик газ импорт қилинган бўлса, октябрда 73,8 миллион долларлик, ноябрда эса 1 млн долларлик импорт амалга оширилган.
Автомобиллар импорти 1,56 миллиард долларга (2,2 баравар), эҳтиёт қисмларники 1,34 миллиард долларга (+16,8 фоиз), самолётлар ва бошқа учувчи аппаратлар импорти эса 753,6 миллион долларгача (3,4 баробар) ошган. Шу билан бирга, ноябрь ойида 139,5 миллион долларлик самолётлар етказиб берилди.
Олдинроқ Статистика агентлиги Ўзбекистон октябрь ойида 1,23 миллиард долларлик олтинни экспорт қилгани тўғрисида хабар берганди. Ўзбекистоннинг расмий захира активлари ноябрь ойида 8 миллион долларга камайиб, 2023 йил 1 декабрь ҳолатига кўра, 32 миллиард 896,5 миллион долларни ташкил этмоқда.
Изоҳ (0)