АҚШ президенти Дональд Трамп ва Россия раҳбари Владимир Путин ўртасидаги 15 август куни Аляскада режалаштирилган учрашув Элмендорф-Ричардсон ҳарбий базасида бўлиб ўтади. Бу ҳақда манбаларга таяниб, CNN хабар берди.

Ташкилотчилар Аляскада саммитни ўтказиш учун ягона мос жой Анкориж шаҳри деган хулосага келган. Хавфсизлик талабларига жавоб бериши мумкин бўлган объект эса Элмендорф-Ричардсон ҳарбий базаси ҳисобланади. Бироқ Оқ уй Россия президенти Америка ҳарбий объектида бўлиши каби вазиятдан қочишни истаган.
Манбаларга кўра, учрашув жойини танлашда Европа вариантлари дарҳол рад этилган. Бунга Гаагадаги Халқаро жиноий суд (ХЖС) томонидан Путинни ҳибсга олиш учун берилган ордер сабаб бўлган. Шу билан бирга, Путин ва Трамп билан яқин муносабатда бўлган Венгрия варианти ҳам кўриб чиқилган.
Россия президенти Бирлашган Араб Амирликларини саммит учун муносиб жой деб атаган бўлса-да, Оқ уй Трампнинг май ойидаги ташрифидан сўнг Яқин Шарққа яна бир узоқ сафарнинг олдини олишни истаган. Охир-оқибат, Путин АҚШ ҳудудида учрашишга рози бўлганида, Америка расмийлари “хурсанд бўлишди ва бир оз ҳайратда қолишди”, дейди манба.
Учрашувнинг бир қисми тор доирада ўтказилади
Оқ уй матбуот котиби Керолин Левиттнинг айтишича, президентлар учрашувнинг камида бир қисмини фақат таржимонлар иштирокида ўтказади.
Трампнинг Путин билан аввалги икки учрашувида ҳам юқори мартабали ёрдамчилар бўлмаган, деб эслатади CNN.
Одатда бундай саммитдан олдин кенг кўламли музокаралар ва бир неча ойлик тайёргарлик кўрилади. Аммо бу сафар бундай бўлмади. Трампнинг ўзи буни “синов” учрашуви сифатида баҳолашини айтмоқда.
Президент шундай ҳис қилмоқда: ъМен бу одам билан бир столда гаплашишим керак. Мен у билан шахсан учрашишим керак. Мен уни ўзидан эшитишим керак. Мен вазиятни унинг кўзига қараб баҳолашим керак, дея саммитга изоҳ берган АҚШ давлат котиби Марко Рубио.
АҚШ махсус вакил Стивен Уиткоффнинг Москвага ташрифидан кейин Путинни Трамп билан учрашишга нима ундагани ҳозирча номаълум.
Изоҳ (0)