Наманган шаҳридаги «Афсоналар водийси» боғида халқаро асал фестивали бошланди. Бу ҳақда «Дарё» мухбири Азизбек Абдувалиев хабар бермоқда.
Вилоятда илк бор ўтказилаётган ушбу тадбир Туризм ва маданий мерос вазирлигининг ҳудудий бошқармаси томонидан ташкил этилди.
Фестивальда Ўзбекистон, Қозоғистон, Қирғизистон ва Тожикистоннинг асаларичилик уюшмалари ва компаниялари вакиллари, тадбиркорлар иштирок этмоқда.
«Халқаро асал фестивали биз учун янгилик, лекин қизиқиш жуда катта эканлигини кўриб турибмиз. Келгусида гуллар фестивали каби бу тадбирни ҳам кенг йўлга қўйиб, анъанавий тарзда, мунтазам тарзда ўтказишни режалаштириб турибмиз. Наманганда бунинг учун барча имкониятлар бор», — деди фестивалнинг очилиш маросимида иштирок этган вилоят ҳокими Шавкат Абдураззоқов.
Вилоят ҳокимининг таъкидлашича, Наманганда асал етиштириш кўрсаткичи йилдан йилга ошиб бормоқда. Жумладан, вилоятда 2018 йили 1728 тонна, 2019 йилда 1937 тонна, 2020 йилда 2473 тонна асал етиштирилган бўлса, 2022 йил якунига қадар бу кўрсаткич 4500 тоннани ташкил этиши кутилмоқда.
Жорий йилда Ўзбекистондан 311 000 дона асалари пакети экспорт қилинган бўлса, шундан 190 000 донаси вилоят улушига тўғри келади. Наманганда ҳозирги кунда 250 000 та асалари оиласи парвариш қилиб келинмоқда.
Фестивальда турли-туман асал маҳсулотлари ва асаларичиликда асқатадиган махсус кийим ва асбоб-анжомлар сотуви, мавзуга оид расмлар танлови, маҳорат сабоқлари, тадбиркорларнинг ўзаро ҳамкорлик ва экспортни йўлга қўйиш бўйича музокаралари бўлиб ўтмоқда.
Тадбир доирасида ташкилотчилар томонидан эҳтиёжманд оилаларга 1 тонна асал бепул тарқатилиши кўзда тутилган.
Мавзуга доир: Наманганда илк бор халқаро асал фестивали ўтказилади
Изоҳ (0)