Афинада озиқ-овқат ва ичимликлар «Food Expo Greece – 2018» халқаро кўргазмаси бўлиб ўтди. Бу ҳақда ЎзА хабар берди.
Бешинчи марта ташкил этилаётган мазкур кўргазма озиқ-овқат маҳсулотлари ва ичимликларига мўлжалланган минтақадаги энг йирик кўргазмалардан бири ҳисобланади. Анъанавий тарзда ўтказиб келинаётган навбатдаги тадбирда АҚШ, Австралия, Бельгия, Болгария, Греция, Хитой, Жанубий Корея, Ҳиндистон, Италия, Исроил, Польша каби дунёнинг 22 давлатидан келган 1250 дан ортиқ компания ва фирма вакиллари иштирок этди.
Савдо-саноат палатаси, Экспортни қўллаб-қувватлаш фонди ва Ўзбекистоннинг Грециядаги консуллиги кўмагида ўзбекистонлик ишбилармонлар илк бор мазкур кўргазмада иштирок этди. Кўргазма доирасида 70 мингдан зиёд иштирокчи ташриф буюрган бўлиб, уларнинг 3,5 мингдан ортиғи дунёнинг 65 мамлакатидан келган харидор ва мутахассислар экани кўргазманинг минтақада нечоғлик муҳим аҳамият касб этишидан далолат.
Ўзбекистон миллий стенди остида тақдим этилган қуритилган мева-сабзавот маҳсулотларини ишлаб чиқариш, қандолатчилик маҳсулотлари, макарон, биологик фаол қўшимчалар, қуритилган меваларни қайта ишлаш, асал, спиртли ичимликлар кўргазма иштирокчиларида катта қизиқиш уйғотди.
Халқаро форумда ўзбекистонлик ишбилармонларнинг Греция, Нидерландия, Бирлашган Араб Амирликлари, Чехия, Покистон, Польша, Озарбайжон, Саудия Арабистони, Хитой каби давлатларнинг етакчи компания вакиллари билан B2B доирадаги учрашувлари ташкил этилди.
Музокараларда Ўзбекистонда етиштирилган мева ва сабзавотлар, озиқ-овқат маҳсулотларини экспорт қилиш ҳамда хорижий ишлаб чиқарувчилар билан замонавий ихчам технологияларни ишлаб чиқаришга жорий қилиш бўйича қиймати 28 миллион долларлик шартномалар имзолашга эришилди.
Изоҳ (0)