Юрист ва блогер Отабек Маҳкамов Ички ишлар вазирлиги академияси раҳбари Рустам Ҳотамов билан учрашгач, академияда дам олиш кунлари эркинликка чиқишни истаган курсантлардан пора олиш каби иллатлар бартараф этилганини ёзди. Бу ҳақда у Facebook’даги саҳифасида маълум қилган.
Бугун Ўзбекистон ИИВ академияси раҳбари Ҳoтамов Рустам Абдуғаниевич билан учрашдим. 20 йил аввал мен шу даргоҳнинг “Тергов фаолияти” факультетини тугатганман. Ўша пайтлар мен ва кўплаб тингловчилар учун мураккаб даврлар эди. Шунинг учун мен бир орзу билан яшаганман. Академияда тартиб-интизом билан бир қаторда, билим ҳам устувор бўлса эди, дердим. Аммо у пайтларда билим олиш эмас, балки арча экиш, нарядлар ва айниқса Жиззах ва Сирдарё вилоятларида ойлаб “маза қилиб”, кунига 100 кило норма пахта териш биринчи ўринда турар эди, дейди блогер.
Отабек Маҳкамовнинг маълумот беришича, академияга Рустам Ҳотамов тайинлангач, кўплаб иллатлар тугатилган.
Бугун Шавкат Мирзиёев томонидан ўтказилаётган жиддий ислоҳотлар даври. Бу ўзгаришларни амалга ошириш учун ўз касбини ҳурмат қиладиган раҳбарларни тайинлаш — ушбу ислоҳотларнинг асосий қисмларидан биридир. Бугун айнан шундай раҳбар билан танишдим. Рустам Абдуғаниевич академия раҳбари бўлиб тайинланганидан сўнг, қуйидаги “ажойиб” усулларни бекор қилди.
Жумладан, пахта терими, нарядда туриш, хўжалик ишларида фаол иштирок этиш, 10–15 километрлик югуришларни тингловчиларга жазо сифатида қўллаш, раҳбарларнинг кайфияти ёмон бўлганида тунда соат 03:00 да тревога эълон қилиб, талабаларни уйғотиб, уларни томоша қилиш, кунига 500 киши кириб-чиқадиган ҳожатхоналарни тозалаш учун старшинага ёқмай қолган битта мен каби курсантни тайинлаш, деб ёзади у.
Юрист баъзан ўтмишга назар солиб, шундай “ажойиб” усуллар устувор бўлган даргоҳда ўқигандан афсусланишини ёзган.
Мен ўтмиш ва келажак билан эмас, балки бугунги кун билан яшайдиган инсонман. Бугун академияда билим устувор. Агар менда Ўзбекистонда қайтадан ўқиш имкони бўлганида, ҳеч иккиланмасдан яна шу академияни танлаган бўлар эдим”, дейди у.
Рустам Абдуғаниевич Ҳотамов 2021 йил академиянинг янги раҳбари бўлган эди. У шу муносабат билан 2018 йил августидан буён эгаллаб турган ички ишлар вазирининг ўринбосари — Кадрлар бош бошқармаси бошлиғи лавозимини тарк этганди. Ҳотамовга қадар академияга 2016 йилдан бери генерал-лейтенант Баҳодир Аҳмедович Матлюбов раҳбарлик қилиб келган.
Изоҳ (0)