Президент қарори билан 2021/2022-ўқув йилидан бошлаб ИИВ академиясида кадрларни тайёрлаш жараёнига бакалавриат ва магистратурани ўз ичига олувчи икки босқичли олий таълим тизими жорий этилади, деб хабар бермоқда Адлия вазирлиги матбуот хизмати.
Қарорга кўра, бакалавриат бўйича ўқитиш кундузги ва сиртқи таълим шаклларида йўлга қўйилади.
Магистратура бўйича ўқитиш раҳбар кадрларни тайёрлашга қаратилади ҳамда иккинчи даражадаги «ташкилий-тактик бошқарув» ва «биринчи даражадаги ташкилий-стратегик бошқарув» йўналишларида амалга оширилади. Магистратуранинг ҳар бир йўналиши бўйича ўқиш муддати 1 йилни ташкил этади.
Шу билан бирга, ИИВ академик лицейларининг ҳуқуқшунослик фани бўйича идоравий фан олимпиадаси ғолиби бўлган битирувчиларининг академияга ўқишга қабул қилиниши учун фақат махсус касбий танловдан муваффақиятли ўтишлари етарли ҳисобланади.
2021 йил 1 сентябрдан ички ишлар органларининг сержант таркибидаги лавозимларида хизматни ўташ учун фақат олий маълумотга эга бўлган шахслар қабул қилинади. Ички ишлар органларининг сафдор таркибидаги лавозимларига номзодлар фақат идоравий академик лицейлар, ҳарбий-академик лицейлар битирувчилари, профилактика инспекторининг ёрдамчилари, шунингдек, олий маълумотга эга ёки сиртқи таълим шакли бўйича таҳсил олаётган шахслар орасидан қабул қилинади.
Шунингдек, қарор билан ИИВ академиясининг Нукус филиали ташкил этилади. Филиалда тўлақонли ўқув жараёни академиянинг бакалавриати бўйича кундузги таълим шаклида 2022/2023-ўқув йилидан бошланади.
Таълим олиш учун номзодлар дастлабки босқичда Қорақалпоғистон Республикаси ва Хоразм вилоятида, кейинчалик Ўзбекистоннинг бошқа ҳудудларида доимий яшовчи шахслар орасидан танлаб олинади.
Филиалга ўқишга қабул қилиш квотаси академияга умумий қабул квотаси доирасида Қорақалпоғистон Республикаси ва Хоразм вилояти ички ишлар органларининг эҳтиёжини инобатга олган ҳолда белгиланади.
Муассасада таълим олган битирувчиларга академия битирувчилари учун назарда тутилган диплом берилади.
Изоҳ (0)