ИИВ академияси курсантлари ва ўқитувчилари хитойлик ҳамкасблари билан тажриба алмашди

Ўзбекистон Ички ишлар вазирлиги академияси профессор-ўқитувчилари ва курсантлари Хитой Жамоат хавфсизлиги вазирлиги қошидаги Хитой халқ полицияси университетида ўтказилган ўқув семинарда иштирок этди. Бу ҳақда ЎзА хабар қилди.

Ўқув семинари давомида академия ўқитувчилари ва курсантлари учун 70 соатлик машғулотлар ташкил этилди. Дарслар университетнинг малакали профессор-ўқитувчилари томонидан инглиз ва рус тилларида олиб борилди. «Полиция тизимида текширувларни амалга ошириш», «Хитой тажрибасида оломонни бошқариш», «Жанговор тайёргарлик машғулотлари», «Далиллар», «Полиция томонидан куч ишлатиш натижасида зарар етказиш», «Халқаро жиноятчилик» ва бошқа шу каби мавзулар бўйича ўтказилган машғулотлар барчада алоҳида қизиқиш уйғотди.

Машғулотлар давомида ҳар бир босқичнинг ўзига хос хусусиятларига алоҳида эътибор қаратилди ва ундаги судлов тизими, мансабдор шахсларнинг мавқеини фарқлаш учун ажратилган кийимлар, жазо ва жазоларни ижро этиш тизими хақида кўплаб қизиқарли маълумотлар тақдим этилди.

Жанговар тайёргарлик машғулотлари назарий ва амалий тарзда ўтказилди. Шунингдек, Ўзбекистон Республикаси ИИВ академияси ҳамда Хитой халқ полицияси университети курсантлари иштирокида қизиқарли спорт мусобақалари, мунозараларга бой давра суҳбатлари ташкил этилди.